Tohfa e khawateen hajj v umrah


            ﺑِﺴْــــــــــــــــﻢِﷲِﺍﻟﺮَّﺣْﻤٰﻦِﺍلرَّﺣِﻴﻢ
           ✰══❖══✰═══❖══✰

        鹿 *TOHFA-E-KHAWATEEN* 鹿
             *⊙ HAJJ -V- UMRAH ⊙*
╨───────────────────── 
*┱✿ Hajj Ki Farziyat Aur Ahmiyat_*

┱ _ Hazrat Ayesha Raziyallahu Anha farmati hai'n k Mai'ne Rasoole Akram Sallallahu Alaihivasallam se Jihaad mai Shareek hone ki ijazat chahi ,Aap Sallallahu Alaihivasallam ne farmaya- Tumhara Yani Aurto'n Ka Jihaad Hajj Hai _,"

* Mishkaat Sharif -221Ba hawala Bukhari v Muslim ,*

┱ _ Hajj islam Ka Paanchva Rukn hai aur Har us Aaqil Baalig Mard v Aurat per Farz hai Jiske Paas Makka Muazzama Tak Aane Jaane Ka Sawaari Ka kharch ho aur Safar Ka tosha mojood ho , Aur Hajj Umr bhar mai Sirf ek martaba Farz hai isse zaa'id Jo Hajj kiya jayega Wo Nifl hoga , Lekin Hajj Nifl Ka sawab bhi Bahut zyada hai , Jis per Hajj Farz ho usne Hajj na Kiya uske liye Sakht Wa'iede waarid Hui hai'n ,

┱ _ Qur'an e Paak mai irshad Hai - Logo ke zimme Baitullaah Sharif Ka Hajj Karna hai Jisko Baitullaah Sharif Tak pahunchane ki Taaqat ho aur Jo Shakhs inkaar Kare to bila shubha Allah Ta'ala Saare jahano se be niyaaz Hai ,

╨───────────────────── 
*┱✿ Hajj na Karne Per Wa'ied_*

┱ _ Hazrat Abu Umama Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k -
Jis Shakhs ko koi Bahut majboori ( Maslan tangdasti ) ya Safar se rokne wala koi marz ya Sahibe Hukumat zaalim Hajj ko jane se na roke aur fir bhi Hajj na Kare to use chahiye k Chaahe To Yahoodi ho Kar Mar Jaye aur Chahe to Nasraani ho Kar Mar Jaye _,"

* Targeeb v Tarheeb An Bayhiqi ,*

┱ _ Kaisi badi Wa'ied hai , Hajj Ka intezam Hote hue bhi Hajj na karne per Yahoodi Ya Iysaai hone ki haalat mai Mar Jane ki Wa'ied sunayi hai , Bahut se Mard aur Aurat per Hajj Farz hota Hai Lekin Duniya ke dhandho aur Aulaad ki shadiyo'n ke jhamele ko bahana banaye rehte hai'n aur Hajj Ka iraada hi nahi karte ,fir Baaz martaba Raqam khatm ho jati hai ya Maut aa jati hai aur Zindgi bhar Hajj Naseeb nahi hota aur Sakht gunahgaar ho Kar Mar Jate hai'n ,

╨───────────────────── 
*┱✿ Hajj aur Umrah Ki Fazilat_*

┱ _ Hajj ki Bahut badi Fazilat hai ,Ek Hadees mai irshad Hai k Jisne Hajj kiya aur usme gandi Baate na ki aur Gunaaho Ka irtkaab na Kiya to wo Apne Gunaaho se ( Paak ho kar ) esa lot ta hai Jesa us Din tha Jabki Apni Maa'n Ke pet se paida hua tha _,"

* Bukhari v Muslim _,"*

┱ _ Ek Hadees mai irshad farmaya k Hajj un sab Gunaaho ko khatm Kar deta Hai Jo Hajj se pehle hue _,"

* Targeeb v Tarheeb _,*

┱ _ Hajj ki tarah Umrah bhi ek mustaqil ibaadat hai Wo bhi Makka mai hota Hai, Isne Kaaba Shareef Ka tawaaf aur Safa Marva ke darmiyan Sa'i ki jati hai , Umrah Sunnate Mo'aqada hai aur Umrah karne walo Ka bhi bada martaba hai , Hajj ko jate hai'n to Bahut se Umrah karne Ka moqa mil Jata hai ,

┱ _Huzoor Akram Sallallahu Alaihivasallam ne farmaya k Hajj aur Umrah karne wale Allah ki Baargaah mai Haazir hone wale log hai'n ,Unka martaba itna bada hai k agar Allah se Dua Kare to qubool farmaye aur agar usse magfirat Talab Kare to wo unko Bakhsh de _,"

* Targeeb v Tarheeb _,*

┱ _Hazrat Abu Huraira Raziyallahu Anhu se Rivayat Hai Rasulullah Sallallahu Alaihivasallam ne Dua ki - Ey Allah Hajj karne wale ki Magfirat farma aur Jiske liye wo magfirat ki Dua Kar de'n uski bhi magfirat farma _,"

* Targeeb v Tarheeb _,"*

╨───────────────────── 
             *┱✿ Hajj Mabroor _*

┱ _ Hazrat Abdullah bin Masoud Raziyallahu Anhu se Rivayat Hai k Huzoor Sallallahu Alaihivasallam ne farmaya k _

"__Hajj aur Umrah Saath Saath Kiya Karo( Yani Hajj Ke Baad Umrah Bhi Karo ),Ye dono tangdasti ko aur Gunaaho ko is tarah door Kar dete hai'n Jese Bhatti Lohe aur Sone Chaandi ke mayl ko door kar deti Hai,

Aur Farmaya k Hajj Mabroor Ka Sawab bas Jannat hi hai _,"

* Tirmizi _,*

┱ _ Hajj Mabroor Wo hai Jo Halaal Maal se Kiya Jaye aur Jisme Gunaaho se Parhez Kiya Jaye aur Hajj mai Jin cheezo se Mana Kiya gaya hai unse door rahe ,

╨───────────────────── 
*┱✿ Aurto'n Ka Jihaad Hajj Hai_*

┱ _ Hazrat Ayesha Raziyallahu Anha ne jab Aap Sallallahu Alaihivasallam se Jihaad mai Shareek hone ki khwahish Ka izhaar Kiya aur Uske bare mai ijazat Talab ki to Aap Sallallahu Alaihivasallam ne jawab mai farmaya k Aurto'n Ka Jihaad Hajj Hai, iska Matlab ye hai k Jihaad mai Jo takleefe hoti hai'n uska bardasht Karna Aurto'n ke bas ki Baat nahi ,ye Kaam Mardo'n Ka hai , Aurte'n agar un kaamo se badh kar zyada sawab Ka Kaam Karna Chahe  to unko Hajj Karna chahiye ,

┱ _ Sahih ibne Khuzema mai hai k Hazrat Ayesha Raziyallahu Anha ne arz Kiya- Ya Rasulallah Sallallahu Alaihivasallam Kya Aurto'n per bhi kisi tarah Ka Jihaad hai ?
Aap Sallallahu Alaihivasallam ne farmaya- Aurto'n per Ek esa Jihaad hai Jisme Jang nahi Yani Umrah aur Hajj _,"

* Targeeb v Tarheeb _,*

┱ _ Hazrat Abu Huraira Raziyallahu Anhu farmate hai'n k Huzoor Sallallahu Alaihivasallam ne farmaya k badi Umr wale aur Za'ief aur Aurat Ka Jihaad Hajj aur Umrah hai _,"

* Ravaah Nasaa'i _,*

┱ _ Hajj ke Shara'i Akhrajaat Mai Safare Madina aur Tabarrukaat Ka kharch Shamil nahi , hisaab lagaye k hamare paas jaaydaad aur Zever aur naqad ki Kis qadar maalyaat hai ,Agar Hajj Farz hota Ho to uski Adaygi mai bilkul Kotaahi na Kare ,Hajj ki farziyat ke liye Makka Shareef Tak Sawaari se aane Jane Ka kharcha aur Raaste ke akhrajaat Ka hona Shart hai ,  ye Raqam Bahut zyada nahi hoti ,

"_ Tabarrukaat Jo khareed Kar laate hai'n aur Jo Maal v Asbaab ya Rishtedaro ko tohfa dene ke liye khareed Kar laate hai'n un sabko Hajj mai Kharch karna Galat hai balki agar Madina munawwara aane Jaane Ka kharch na ho aur Makka Tak Aane Jaane Ki qudrat ho to is Soorat mai bhi Hajj Farz ho jata Hai, Albatta Fees muallim aur Wo akhrajaat Jo hukumato ne qanoonan Laazim kar rakhe hai'n Unka kharch Hajj Ke kharch mai shumaar hoga , Agarche Baaz Tax ese hai'n Jo Hukumato ko unka Lena Durust nahi Lekin Unke bager Chunki Hukumat Jaane nahi deti isliye Majbooran unka kharch bhi zaroorate Hajj mai Shamil hoga ,

╨───────────────────── 
*┱✿ Safare Hajj mai Nazar Ki Hifazat aur Parde Ka Ahatmaam _*

┱ _ Hazrat Abdullah bin Abbaas Raziyallahu Anhu se Rivayat Hai k Hajjatul Vida ke moqe per ( muzdalfa se Mina ko waapas Hote hue ) Fazal bin Abbaas Raziyallahu Anhu Huzoor Akram Sallallahu Alaihivasallam ki Sawaari per pichhe bethe hue they, is Asna mai Qabila Bani Khas'am ki ek Aurat ( Masla Maloom karne ke liye ) Baargaahe risalat mai Haazir Hui , Fazal bin Abbaas Raziyallahu Anhu us Aurat ko dekhne lage aur Wo Aurat unko dekhne lagi ( Chunki Bad Nazri Mardo'n aur Aurto'n dono ke liye Sakht Mana hai aur Hajj jesi ibaadat Ke moqe per Gunaah Ka irtkaab sangeen hai isliye ) Huzoor Aqdas Sallallahu Alaihivasallam ne Fazal bin Abbaas Raziyallahu Anhu Ka Chehra pakad Kar Doosri taraf fayr diya ( Jisse dono ek doosre ki taraf dekhne se Mehfooz ho gaye )

Iske baad us Aurat ne Rasulullah Sallallahu Alaihivasallam se Sawal Kiya k bila shubha Allah ke farize Yani Hajj ne mere Budhe Baap ko pa liya hai ( aur Wo is qadar Budhe aur Za'ief hai'n k ) Sawaari per jam Kar nahi Beth sakte to Kya Mai'n Unki taraf se Hajj Kar lu'n ?
Aap Sallallahu Alaihivasallam ne jawab diya k Haa'n ( Baap ki taraf se Hajj Kar lo ) _,"

* Bukhari Sharif - 205 _,*

┱ _ Is Hadees se maloom hua k Safare Hajj mai Mardo'n aur Aurto'n ko Bad nazri se bachne Ka Khaas Ahatmaam Karna Laazim hai , Aaj Kal Hajj Umrah ke Safar mai Bad nazri aur Be pardgi had se zyada hoti hai ,Achhchi khaasi Parde wali Aurte'n Burqa utaar Kar rakh deti hai'n aur Goya ye samajhti hai'n k Hajj mai Parda Shar'an nahi Hai ye badi Jahalat ki Baat hai ,

┱ _ Hazrat Ayesha Raziyallahu Anha Ka Bayan hai k ( Safare Hajj mai ) hamare qareeb se Haaji log guzarte they aur Hum Rasulullah Sallallahu Alaihivasallam ke Saath ahraam baandhe hue they ( Chunki Ahraam mai Aurat ko moonh per Kapda lagana Mana hai isliye hamare Chehre khule hue they aur Chunki Parda Karna Hajj mai bhi Laazim Hai ) isliye Jab Haaji log hamare barabar se guzarte to hum badi si Chaadar ko Sar se gira Kar Chehre ke saamne latka lete aur Jab Haaji log aage badh Jate to hum log Chehra khol lete they _,"

* Abu Daowd _,*

┱ _Maloom hua Safare Hajj mai bhi Parde Ka Ahatmaam Karna Laazim hai, is Waqi'a se Magrib zada logo ki tardeed bhi ho jati hai Jo kehte hai'n k Chehra kholna Na Mahram ke saamne Jaa'iz hai , isliye Naqaab Wala Burqa Apni Aurto'n ko nahi udaate , Agar Na Mahram se Chehra kholna Laazim na hota to Hazrat Ayesha Raziyallahu Anha aur Digar Sahabi Aurte'n Haaji logo se Chehra chhupane Ka ahatmaam Kyu karti ?

╨───────────────────── 
*┱✿ Aurat Ko Bager Mahram Hajj Ke Liye Jana Gunaah Hai_*

┱ _ Hazrat ibne Abbaas Raziyallahu Anhu se Rivayat Hai k Rasoole Akram Sallallahu Alaihivasallam ne farmaya k - Hargiz koi Mard kisi ( Ajnabi ) Aurat ke paas tanhayi mai na rahe aur Hargiz koi Aurat Safar na Kare Magar ye k uske Saath Mahram ho ,

Ye Sun kar ek Shakhs ne arz Kiya- Ya Rasulallah Sallallahu Alaihivasallam Mera naam Fala Fala Jihaad mai likha gaya Hai aur Meri Bivi Hajj Ke Liye nikal chuki hai ( Chunki ye Jihaad Farze Ayn nahi Tha isliye ) Aap Sallallahu Alaihivasallam ne farmaya - Jao Apni Bivi ke Saath Hajj Karo _,"
.
* Mishkaat Sharif Ba hawala Bukhari v Muslim,*

┱ _ Aurat Kamzor bhi hai aur Fitne Ka Sabab bhi isliye Shari'at ne ye qanoon rakha hai k Safar Deeni ho ya Duniyavi door ke safar per Aurat bager Mahram ke na Jaye , Bahut si Aurte'n Mahaz Shoq aur zoq ko dekhti hai'n Shari'at ke qanoon ko nahi dekhti aur gair Mahram ke Saath Hajj ke liye chal deti hai'n ,Ye Sarasar Haraam hai , Bhala Jis Hajj mai Shuru se Aakhir Tak Shari'at ki khilaf varzi ki gayi ho Wo kese Mabroor aur Maqbool ho Sakta Hai ? Bager Mahram ke 40 meel Ka Safar Aurto'n ke liye Jaa'iz nahi Agarche Wo Hawaii Jahaaz ya Rail see ,Door ke Safar se itni musafat muraad hai , 

╨───────────────────── 
*┱✿ Aurat Ke Safare Hajj Ke Mutalliq Chand Masa'il _*

┱ _ Jis Aurat ke paas itni maaliyat ho k Jo Makka Muazzama Tak Apne kharche se aa ja aakti hai lekin uske Saath Jane Wala Shohar ya Koi Mahram na ho to us per Hajj Ke Liye Jana Farz nahi Hai, Agar Mahram ke bager Hajj per chal degi to gunahgaar hogi , Jab Mahram Saath ho ya Shohar ke Saath Jane ki Soorat ho Jaye tab Hajj Ke Liye rawana ho , Mahram Ka Aaqil Baalig aur Deendar hona Shart hai, Agar Faasiq ho aur usse khatra ho to uske Saath na Jaye ,

*┱ _Masla _,* Agar Mahram ya Shohar Apne  kharch se Saath Jane per taiyaar nahi ho to uska kharcha bhi Aurat ke zimme hai , Haa'n agar Wo Apna kharcha khud bardasht Kare to Kuchh harj nahi ,

"*__ Budhi Aurat bhi bager Mahram ke Hajj ko nahi ja sakti aur na kisi Doosre Safar Jo door Ka sarar ho ,

*┱ _ Masla_* Agar Aurat per Hajj Farz ho gaya aur Mahram bhi Saath Jane ko Taiyaar hai to Shohar usko Hajj Farz Karne se nahi rok Sakta , Haa'n agar Mahram Saath na ho ya Hajj Nifli ho to Shohar ko rokne Ka Haq hai ,

"__ Aurat ko Doosri Aurato'n ke Saath mil Kar bhi bager Mahram ya bager Shohar door ke safar per Jana Jaa'iz nahi ,

*┱ _ Masla_* Agar Aurat ke paas Hajj Ka kharcha Hai aur Mahram ya Shohar bhi mojood hai lekin iddat mai hai to usko Hajj Ke Liye Jana Jaa'iz nahi hai Khwah iddat fiskh Nikaah ki ho ya talaaq ki ya Shohar ki Maut ki , Agar iddat mai Hajj ko chali jayegi to gunahgaar hogi ,

*┱ _ Masla_* Agar Aurat ke paas Hajj Ka kharcha hai Lekin Mahram ya Shohar nahi Hai aur Umar bhar Mahram na Mila to Marne se pehle Wasiyat Kar Jana Waajib hai k Meri taraf se Hajj Kara diya Jaye aur ye Wasiyat uske tihaa'i Maal mai naafiz hogi ,

╨───────────────────── 
*┱✿ Bachche Ko Hajj Karane Ka Sawab_*

┱ _ Hazrat Abdullah bin Abbaas Raziyallahu Anhu se marvi hai k Huzoor Aqdas Sallallahu Alaihivasallam se maqaame Ravha Mai Chand musafiro ki mulaqaat Hui , Aap Sallallahu Alaihivasallam ne daryaft farmaya- Tum Kon log ho ?
Unhone kaha k hum Musalman hai'n , 
Fir Unhone Aap Sallallahu Alaihivasallam se daryaft Kiya k Aap ( Sallallahu Alaihivasallam ) Kon hai'n ? 
Aap Sallallahu Alaihivasallam ne farmaya k Mai'n Allah ka Rasool hu'n ,

Usi Waqt ek Aurat ne Apna Bachcha ouper uthaya ( aur Aap Sallallahu Alaihivasallam ko dekh kar ) Kehne lagi Kya iska ( Bachche Ka ) Hajj ho Sakta Hai ?
Aap Sallallahu Alaihivasallam ne farmaya- iska Hajj ho jayega aur Tujhko ( bhi ) sawab milega _,"

* Mishkaat Sharif-221 Ba hawala Muslim,*

┱ _ Is Hadees se Sahabi Aurto'n ke Deeni Sagaf Ka ilm hua , Haalate Safar mai jab ek Aurat ko pata Chala k Rasulullah Sallallahu Alaihivasallam tashreef le ja rahe hai'n to usne moqa Ganimat Jana aur foran ye Masla daryaft Kar liya k Bachche Ka hajj ho Sakta Hai ya nahi , Aap Sallallahu Alaihivasallam ne farmaya k Haa'n iska Hajj ho jayega aur Tum Jo iska Ahraam bandhwaogi aur Jo cheeze Ahraam mai Mana hai unse bachwaogi aur Hajj mai Jaha'n Jaha'n theharte hai'n Waha'n Waha'n isko Saath le ja Kar thehraogi aur Digar Hajj Ke Ahkaam Ada karwaogi to tumko bhi sawab milega,

┱ _ Hadees Paak se maloom hua k Sahate Hajj Ke Liye Baalig hona Shart nahi hai ,Na-Baalig Ka Hajj bhi ho jata Hai Lekin ya Hajj  Farz Hajj Ke qaa'im muqaam na hoga ,Agar Baalig ho kar ye Bachcha Sahibe isteta'at ho to dobara Hajj Karna Farz hoga ,

           ✰══❖══✰═══❖══✰

*┱✿ Ramzanul Mubarak mai Umrah Karne Ka Sawab _*

┱ _ Hazrat Abu Bakar bin Abdurrahman  Raziyallahu Anhu se Rivayat Hai k Ek Sahabi Khatoon Raziyallahu Anha Huzoor Aqdas Sallallahu Alaihivasallam ki khidmat mai Haazir Hui aur arz Kiya k - Ya Rasulallah Sallallahu Alaihivasallam Mai'ne Hajj ko jane ki taiyaari ki thi fir Uzr pesh aa gaya Jiski vajah se na ja saki ( ab Hajj Ka sawab haasil karne ke liye koi Raasta bataiye )

Aap Sallallahu Alaihivasallam ne jawab mai farmaya k Tum Ramzan mai Umrah Kar lo Kyunki Ramzan mai Umrah Karne Ka Sawab Hajj karne ke barabar hai _,"

* Mauta Imaam Maalik -134 ,"*

┱ _ Umrah bhi mustaqil ibaadat hai aur Badi Sa'adat hai , Hajj ki tarah Umrah bhi Makka Muazzama hi mai Ada hota Hai, Agar Apne watan se Umrah ke liye ja rahe hai'n to Raaste mai Jo Ahraam baandhne ki jagah aati hai ( Jisko Miqaat kehte hai'n ) Waha'n se Ahraam baandh le ,Aur agar Makka mai Hote hue Umrah Ka iraada kare to Umrah Ka Ahraam baandhne ke liye Haram Shareef se Bahar Jana padta hai ,Sabse qareeb jagah Jaha'n Had e Haram khatm hoti Hai Tan'iem hai Jo Makkah Mukarrama se Teen meel hai , Tan'iem mai Masjid bani Hui Hai Jise Masjide Ayesha ( Raziyallahu Anha ) kehte hai'n , Huzoor Aqdas Sallallahu Alaihivasallam ne Hazrat Ayesha Raziyallahu Anha ko Unke Bhai Abdurrahman bin Abu Bakar Raziyallahu Anhu Ke Saath Makka Muazzama se yaha'n bheja aur Tan'iem se Ahraam baandh Kar aayi aur Makka Muazzama mai aa Kar Umrah Ada Kiya ,

┱ _ Umrah Ka Ahraam baandh Kar jab Makka Mukarrama pahunche to Kaaba Shareef Ka tawaaf Kare , Fir Do Raka'at Waajib tawaaf padhe aur Safa Marva ki Sa'i Kare , iske baad ba qadre ek pora Baal kata Kar Ahraam se nikal Jaye'n , Kam az Kam Chothaai Sar ke baal Kat Jaye , Umrah mai Jo Sunnat aur Mustahabaat hai'n Unka bhi Khayal rakhna chahiye ,

┱ _ Umrah ke liye koi Waqt muqarrar nahi Hai ,Saal bhar mai Jab Chahe Umrah Kar le Albatta Paanch Din ese hai'n Jinme Umrah Ka Ahraam baandhna mana hai , Zilhijja ( Bakra Eid ) Ki 9-10-11-12-13 taraeekh ,

╨───────────────────── 
*┱✿ Doosre Ki Taraf Se Hajj Karna_*

┱ _ Hazrat Abdullah bin Abbaas Raziyallahu Anhu se Rivayat Hai k Hajjatul Vida ke moqe per Qabila Bani Khas'am ki ek Aurat ne arz Kiya- Ya Rasulallah Sallallahu Alaihivasallam ! Fariza e Hajj Ka waqt ese moqe per aaya hai k Mere Waalid khoob Budhe hai'n Jo Sawaari per Jam Kar nahi Beth sakte , Kya Mai'n Unki jaanib se Hajj Kar lu'n ?
Aap Sallallahu Alaihivasallam ne farmaya- Haa'n _,"

* Mishkaat Sharif-221 ba Hawala Bukhari v Muslim,*

┱ _ Is Hadees se bhi Zamana E Nabuwat ki masturaat ke Deeni shoq aur Deeni malumaat haasil karne ke Sachche Jazbe Ka pata Chala hai , Ahde Nabuwat ki Khawateen ibaadat karne mai aur Masa'il maloom karme mai bahut se Mardo'n se kam na thi , Huzoor Aqdas Sallallahu Alaihivasallam ko dekh Kar Bani Khas'am ki ek Aurat ne ye maloom Kar liya k Mai'n Apne waalid ki taraf se Hajj Kar sakti hu'n ya nahi ? Aap Sallallahu Alaihivasallam ne farmaya k Haa'n Kar sakti ho , Ye koi farz nahi k Mard ki taraf se Mard aur Aurat ki taraf se Aurat hi Hajj Kare ,balki Aurat ki taraf se Mard aur Mard ki taraf se Aurat bhi Hajje Badal Kar sakti Hai ,

╨───────────────────── 
*┱✿ Hajj E Badal Ke Chand Masa'il_*

┱ _ Jis Shakhs per Hajj Farz ho aur Woh Sakht mareez ya Bahut zyada Kamzori ki vajah se Hajj karne per qaadir na Raha ho to Apni taraf se Kisi ko bhej Kar Hajj Ada Kara de ,Lekin agar Kabhi Tandurast ho gaya aur khud Hajj karne ki Taaqat aa gayi to dobara Hajj Karna Laazim hoga aur pehle martaba Jo Hajj karaya hai uska bhi sawab Payega , Aur agar kisi Shakhs per Hajj Farz nahi Tha ya Hajj Kar liya hai aur fir koi Shakhs uski taraf se bator Nifli Hajj Karna Chahe to isme ye Shart nahi hai k Jiski taraf se Hajj Kiya Jaye Wo khud Jane se Aajiz ho ,

*┱ _ Masla_,* Jis per Hajj Farz ho aur usne gaflat aur Kotaahi ki vajah se Hajj nahi kiya yaha'n Tak k Maut aane lage to us per Laazim hai k Apni taraf se Hajj Karane ki Wasiyat Kare aur ye Wasiyat uske Chothaai Maal mai naafiz hogi aur Do tihaa'i Maal Waariao ko milega ,

*┱ _ Masla_,* Agar Marne wale ne Wasiyat na ki Halanki us per Hajj Farz tha tab bhi uska Beta Beti ya Doosre waaris Apni Khushi se Apne Maal se ya tarke ki Raqam se uski taraf se Hajj Kar le ya kisi ko Kara de ,Tab bhi Allah Ta'ala se Ummeed hai k uska Hajj Ada ho jayega ,

"_Albatta Jo waaris na Baalig ho ya Jo gaa'ib ho ya Jo khushdili se ijazat na de Unke hisse mai Jo tarka aata Hai usko is Kaam mai na lagaye , Na Baalig agar ijazat de tab bhi uska Maal Hajje Badal mai na lagaye Kyunki uski ijazat motbar nahi Hai ,

*┱ _ Masla_,* Jis Shakhs ne pehle Hajj na Kiya ho usko Hajje Badal Ke Liye bhejna makrooh hai lekin agar kisi ese Shakhs ko Hajje Badal Ke Liye bhej diya Jisne khud Hajj nahi kiya Tha aur usne doosre ki taraf Hajj karne ki Niyat Kar ke Hajj Kar liya to Hajj Badal Ada ho jayega ,

           ✰══❖══✰═══❖══✰

*┱✿ Haiz Aur Nifaas Wali Aurat Ahraam Ke Waqt Kya Kare ?-*

┱ _ Hazrat Jaabir Raziyallahu Anhu se Rivayat Hai k Hijrat ( ke Baad ) Rasulullah Sallallahu Alaihivasallam  Madina munawwara mai Nau (9 ) saal Qayaam farma rahe , ( aur is arse mai kisi saal bhi ) Hajj nahi Kiya ,Fir Dasve saal Aap Sallallahu Alaihivasallam ne logo mai Hajj Ka Elaan farmaya k Rasulullah Sallallahu Alaihivasallam is Saal Hajj farmane wale hai'n ,

Elaan Sun Kar Kaseer tadaad mai log Madina munawwara Haazir ho gaye ( Taki Aapke Saath Hajj Ke Liye rawana ho ) Chunache hum log Aapke Saath ( Hajj Ke iraade se ) rawana hue ,Jab Muqaame Zul Hulayfa per pahunche ( Jo Ahle Madina ki Miqaat hai ) to waha'n Asma binte Umays Ke Batan se Muhammad bin Abi Bakar paida ho gaye , Unhone Rasulullah Sallallahu Alaihivasallam ki khidmat mai Sawal bheja k Mai'n ab Kya karu'n ? Aap Sallallahu Alaihivasallam ne farmaya k tum Gusl Kar lo aur Kisi Kapde se langot kas lo aur Ahraam baandh lo _,"

* Mishkaatul Masabeh-224 Az Sahi Muslim,*

┱ _ Wiladat ke Baad Khoon Jaari ho jata Hai Jisko Nifaas kehte hai'n aur iske Ahkaam bhi Wahi hai'n Jo Haiz ( Maahwaari ) ke ahkaam hai'n , Jab Haiz v Nifaas Ka Zamana ho to Kai ibaadate Mana ho jati hai'n Chunki Hajj ek Aham ibaadat Ka Safar tha aur Makka Muazzama pahunch Kar Hajj Karna tha aur isse pehle is tarah Ka Waqi'a pesh nahi aaya tha isliye Masla jaanne ki zarurat thi k is haalat mai Hajj Ka Ahraam baandhe ya nahi aur fir Ahraam baandhne ke Baad Hajj kese Kare , Lihaza zaroori hua k Huzoor Akram Sallallahu Alaihivasallam se is bare mai daryaft Kiya Jaye , Aap Sallallahu Alaihivasallam ne irshad farmaya k Gusl kar lo aur Langot kas lo aur Ahraam baandh lo , Chunache Unhone esa hi kiya aur Ahraam baandh Kar hajj ke arkaan v af'aal Ada kiye ,

┱ _ Maloom hua k Haalate Haiz ho ya Haalate Nifaas ho ,ye dono Haalate Ahraam se rokne wali nahi hai'n ,Gusl Kar ke aur Langot baandh Kar Hajj ya Umrah ki Niyat Kar ke Labbayk Allahumma Labbayk ... Aakhir Tak padh le ,Esa Karne se Aurat Ahraam mai dakhil ho jayegi Albatta Ahraam ki raka'ate na padhe Kyunki Namaz ke liye Paak hona Shart hai ,

┱ _ Hajj mai Sirf ek Esi Cheez hai Jo Haiz v Nifaas ki haalat mai nahi ho sakti baqi doosre Ahkaam Jo Arafaat, Muzdalfa ,Meena mai Ada kiye jate hai'n Unke liye Paak hone Shart nahi Hai aur Wo Haalate Haiz v Nifaas mai aur janabat ( Gusl Farz hone ki haalat ) mai aur be Vazu Ada ho sakte hai'n , Aur Jab koi Aurat Hajj Ka Ahraam Haiz v Nifaas ke dino mai baandh le to Makka Muazzama pahunchne ke Baad Paak hone Tak Tawaafe Qadoom na Kare Jo Masnoon hai ,Jab Paak ho Jaye to tawaaf Kar le , Ye Tawaaf Meena Arafaat Jane se pehle hota Hai aur Arafaat, Muzdalfa ,Meena ke Sab Ahkaam Ada Kare ,

┱ _ Baarhvi Tareekh Ka Suraj Chhipne se pehle pehle Paak ho Jaye to Gusl Kar ke tawafe Ziyarat Kar le ,Tawafe Ziyarat Farz hai aur jo Baarhvi Tareekh ke andar andar ho Jana Waajib hai , Ye Tawaaf 10-11-12 teeno dino mai se kisi kar Lena Laazim hai lekin agar koi Aurat in teeno dino mai bhi Haiz ya Nifaas se Paak na ho to Makka Muazzama mai Muqeem rahe aur Paak hone ke baad Tawafe Ziyarat Kar le ,Iske Baad Tawafe Vida Kar ke Watan ke liye rawana ho Kyunki ye takheer Shara'i majboori ki vajah se hogi ,isliye Tawafe Ziyarat ko Baarhvi Tareekh se let karne ki vajah koi Dam vager Waajib nahi hoga ,

           ✰══❖══✰═══❖══✰

*┱✿ Haiz Ki Vajah se Tawafe Vida Chhod Dena _*

┱ _ Hazrat Ayesha Raziyallahu Anha se Rivayat Hai k Unhone ( Ahkaame Hajj se faarig ho Kar Madina munawwara ko waapas hone ke moqe per ) arz Kiya k - Ya Rasulallah Sallallahu Alaihivasallam ! Safiya ko Ayyaame Maahwaari Shuru ho gaye , 
Aap Sallallahu Alaihivasallam ne irshad farmaya Shayad k Wo Humko Safar se rokegi , Fir Aap Sallallahu Alaihivasallam ne daryaft farmaya - Usne Tumhare Saath tawaaf ( Ziyarat ) nahi Kiya ? 
Arz Kiya- Haa'n Tawafe Ziyarat to Kar chuki hai ,
Farmaya - Bas to usse kaho ( Madina munawwara ke liye ) rawana ho Jaye _,"

* Sahih Bukhari -1/47 ,*

*┱ _  Tashreeh _,* _ Hajj mai Teen Tawaaf hai'n _

*1_ Tawafe Qadoom_,* _ Jo Sunnat hai aur Makka Muazzama pahunch Kar Meena v Arafaat ki rawaangi se pehle Kiya Jata hai _,

*2_ Tawafe Ziyarat_,* _ Jisko Tawafe Rukn bhi kehte hai'n, ye Arafaat mai Asar ke Baad Zilhijja ki 10 -11-12 Tareekho mai se kisi bhi Tareekh mai Kar liya Jata hai , Ye Tawaaf Farz hai ,

*3_ Tawafe Vida _,* _ Yani rukhsat hone Ka Tawaaf , Hajj Ke Ahkaam se faarig hone ke baad jab Watan ke liye rawana hone lage us Waqt Tawafe Vida kiya Jata hai aur ye Tawaaf Waajib hai , Agar is Tawaaf ko Chhod Kar koi Hajj karne Wala Mard ya Aurat Watan Chala Jaye to ek Dam Waajib hota Hai Yani Hudoode Haram mai ek Bakri ek saal ki Umar wali zibah karana Laazim hota Hai , Haa'n agar koi Shakhs Watan se waapas aa Kar Tawaaf Kare to ye Dam saaqit ho jata Hai ,Lekin Tawafe Ziyarat ke Baad agar kisi Aurat ko Haiz aa gaya aur us Waqt Paak hone se pehle kisi taqaaze ki vajah se Tawafe Vida Chhod Kar Watan ke liye rawana ho gayi aur Hudoode Makka se nikal Kar Paak Hui , chali Jaye to us per tarke Tawaaf se koi Dam Waajib nahi hoga ,aur na koi Gunaah hoga ,

*┱ _ Faayda _,* _ Agar Tawafe Ziyarat ke Baad kisi Aurat ne koi Nifl Tawaaf Kar liya to wo Tawafe Vida ke qaa'im muqaam ho jayega , isi tarah agar Tawafe Ziyarat ke Baad Tawafe Vida ki Niyat se koi Tawaaf Kar liya tab bhi Vida Ada ho gaya , Agar uske baad Makka Muazzama mai rahi aur Haiz aa gaya Jiski vajah se rawaangi ke waqt Tawaaf na Kar saki to Yu'n na samjha jayega k Tawafe Vida chhot gaya , Kyunki Tawafe Vida ki Adaygi ke liye ye Shart nahi hai k Ayn rawaangi ke waqt ho ,Khoob samajh le , 
  
*Alhamdulillah Tohfa E Khawateen Mukammal Hua , *
                        
▦══─────────────══▦

ReF✿┅╮   
         * Tohfa E Khawateen,*
                  ╨───────────────────── 
                 
★ ╒═━┅━┅┅━┅┅━┅┅━┅━┅━┅━┅═╕
