Tohfah e khawateen hijaab v ahkaam


                    ﺑِﺴْــــــــــــــــﻢِﷲِﺍﻟﺮَّﺣْﻤٰﻦِﺍلرَّﺣِﻴﻢ
           ✰══❖══✰═══❖══✰

     鹿 *TOHFA-E-KHAWATEEN* 鹿

        *⊙ HIJAAB -V- AHKAAM ⊙*

╨───────────────────── 
*┱✿ Aurat Chhupa Kar rakhne Ki Cheez Hai _*

┱ _ Hazrat Abdullah bin Umar Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k - Aurat Chhupa Kar rakhne ki Cheez hai aur bila Shuba jab Woh Apne Ghar se Bahar nikalti hai to use Shaitaan taakne lagta hai , aur ye Baat Yaqeeni Hai k Aurat us Waqt Sabse Zyada Allah se qareeb hoti Hai Jabki Woh Apne Ghar ke andar hoti Hai _,"

* Attargeeb v Tarheeb , Ravaah Tabrani _,*

┱_ Hadees mai Avval to Aurat Ka muqaam bataya gaya hai k Aurat Chhupane ki Cheez hai , Aurat ko ba haisiyat Aurat ke andar rehna Laazim hai , Jo Aurat Bahar firne lage Wo hudoode naswaniyat se bahar ho gayi ,

Iske baad farmaya k Aurat Ghar se Bahar nikalti hai to Shaitaan uski taraf nazre utha utha kar taakna Shuru Kar deta Hai , Yani Shaitaan is koshish mai rehta Hai k log uske Khado khaal husno Jamaal , aur Libaas v poshaaak per Nazar daal daal Kar lutf andoz ho ,

Uske baad farmaya k Aurat us Waqt Allah ke Sabse qareeb hoti hai jab Woh Apne Ghar ke andar hoti Hai, Jo Aurat Allah ka qurb haasil karna chahti hai ,Apne ko Ghar ke andar rakhna hi pasand karti Hai aur Bahar nikalne se gurez karti Hai ,

┱_ Islam ne Aurto'n ko Hidayat di hai k jaha'n Tak Mumkin ho Apne Ghar ke andar hi rahe kisi majboori se Bahar nikalne ki zarurat ho to isme kuchh Pabandiya'n lagayi gayi  Hai , Maslan Khushbu laga Kar na nikle , Raaste ke darmiyan na chale ,Parde ke Saath Poore Badan per Moti Chaadar lapet Kar nikle , vagera ,

┱_ Neez farmaya k Mard ki Nazar kisi Na-Mahram Aurat per ya Aurat ki Nazar kisi Na-Mahram Mard per pad Jaye to Foran Nazar hata le , Agar kisi majboori mai kisi Na-Mahram Mard se Baat Karni pade to naram guftaari se baat na kare , Aur ye bhi irshad farmaya hai k Aurat bager Mahram ke safar na kare ,Mahram bhi Woh ho Jis per Bharosa ho ,Faasiq Mahram Jis per itminaan na ho uske Saath safar Karna bhi Durust nahi , Isi tarah Kisi Na-Mahram Mard Ke Saath tanhayi mai rehne ki bilkul ijazat nahi , Ye Sab Ahkaam dar haqeeqat uffat v Asmat ki hifazat rakhne ke liye diye gaye hai'n ,

╨───────────────────── 
*┱✿ Makhloot Taleem Ka Zehar_*

┱ _ Aaj Kal Ladkiyo'n ko schoolo College mai padhane ke liye bhejte hai'n ,Unko ounchi Digriya'n dilane ki koshish karte hai'n , Avval to isme is Hukm ki khilaf varzi hai k Aurat Apne ghar mai rahe ,Agar Baahar nikalna ho to Jo Shara'it hai'n Unke Saath ba darja majboori ke nikal sakti hai'n , Lekin Ladkiya'n Parde ke Ahatmaam ke bager nikalti hai'n aur khoob ban than Kar Khushbu laga kar Jaati Hai'n ,

┱_ Iske Baad rahi Sahi Kasar Makhloot Taleem ne poori kar di ,Ek hi Class mai Ladke aur Ladkiya'n Be Parda ho kar bethte hai'n , aur Islami Ahkaam ko pamaal karte hai'n, Aur Jo log  in Baato per Nakeer karte hai'n aur batate hai'n k ye Gair Shara'i tareeqa hai ,Wo kesi hi Aayat ,Hadees Pesh Kare ,Unki Baat ko Dakiyanoosi Keh kar taal diya Jata hai , Allah Ta'ala iski samajh de aur Deen Ke Sahi Taqaze ko samajhne ki tofeeq ata Kare , ( Aameen )

╨───────────────────── 
*┱✿ Islam iffat v Asmat Wala Deen Hai _*

┱ _ Islam Haya aur Sharm ,iffat v Asmat,gairat v hamiyat Wala Deen hai ,isne insaniyat ko ouncha muqaam diya hai ,Insaan aur Haywaan mai to imtiyazi Farq hai Wo Islam Ke ahkaam padhne se waaze ho Jate hai'n , Islam ye Hargiz gawara nahi karta k insaano mai haywaniyat aa Jaye aur Jaanwaro ki tarah Zindgi guzaare ,

┱_ Mardo'n aur Aurto'n ke andar Jo Ek doosre ki taraf maa'il hone Ka Fitri taqaza hai , Shari'at e islamiya ne Unki Hudood muqarrar farmayi hai , Huqooqe Nafs aur Hufooze Nafs sabka Khayal rakha hai , Lekin insaan ko Shatre be muhaar ki tarah nahi chhoda k Jo Chahe khaye aur Jo Chahe pehne aur Jaha'n Chahe Nazar daale aur Jisse Chahe lazzat haasil Kare ,

"_" Bahut se log jo naam ke Musalman hai'n Agarche Duniya ke ilm mai Maahir hai'n aur Duniyavi mamlaat se achchhi tarah waaqif hai'n , Urop v America ke yahoodo Nasaara aur Bad Deen aur Zindeeqo ki dekha dekhi  balki Unki targeeb aur tehreer se mutassir ho Kar Musalmano ko bhi Be hayaai ke Sailaab mai baha Dena chahte hai'n ,

┱_ Jab ese Logo ke saamne Parde ke Ahkaam v Masa'il pesh kiye Jate hai'n to Qur'an v Hadees ki waaze Dala'il saamne Hote hue bhi badi besharmi aur dhitaayi ke Saath Keh dete hai'n k ye Sab Baate Molviyo'n ne nikaali hai , ( Yu'n bhi kaha Jata hai k Tum log Anpad Jaahil ganwaar ho ,Pichhde log ho , Dakiyanoosi baate karte ho ) Aurto'n ko be Parda firaane balki Clubo mai Nachwane ko ye log Taraqqi se tabeer karte hai'n ,( Astagfirullah )

╨───────────────────── 
*┱✿ Konsi Taraqqi Mehmood Hai ?_*

┱ _ Aurat Sifat se Naazuk to hai hi ,Kam samajh bhi hai , Jab unko behka diya Jata hai k Parda Taraqqi ke liye aad hai aur Mulla ki ijaad hai to ye Apni nadaani ki vajah se is Baat ko dimaag mai betha leti hai aur Melo ,Julooso aur Parko bazaaro mai aur Tafreeh gaaho mai Be Parda ho Kar be dhadak Mardo ke saamne Ghoomti firti hai'n aur Behayai aur iffat v Asmat ko daagdaar karne wale Amal ko Taraqqi samajhti hai ,

┱_ Dushmanane islam ne bas Taraqqi Ka lafz Yaad Kar liya hai aur ye bhi nahi Jaante k Kis Cheez ki Taraqqi Mehmood Hai aur Konsi Taraqqi Mazmoom hai , Agar Qaum ki Bahu Betiya'n be Parda ho Kar Gharo se nikle aur Bazaaro Parko mai Mardo ke Saath mil jul Kar Ghoomti fire to isme Kis Cheez ki Taraqqi hai ? Kya isse insaaniyat Taraqqi pa gayi ? Ya gairat aur Sharafat mai Kuchh izafa ho gaya ?

┱_ Nahi Nahi , balki isse to Asmat v iffat ke lut Jane ki raahe khul gayi , insaan ki Sharafat aur karaamat barbaad hone ke intezamaat ho gaye , Buraa'i ki Taraqqi bhi Kya koi Taraqqi hai ? Esi Taraqqi to Shaitaan aur uske Dosto ko pasand hoti Hai, Buraa'i ki Taraqqi Allah aur uske Rasool Sallallahu Alaihivasallam ko Na Pasand hai aur Mukhliseen v Momineen v Mominaat ko Pasand nahi hoti ,

╨───────────────────── 
*┱✿ Hifazate Nazar Ka Hukm -,_*

┱ _ Sabse Badi Cheez Jo Ek Mard ko Aurat ki taraf ya Ek Aurat ko Mard ki taraf maa'il karne wali hai Wo Nazar hai , Qur'an Majeed mai dono ko hukm diya hai k Apni nazre past rakhe ,Surah Noor mai Pehle Mardo ko Hukm farmaya :-

"__Aap ( Sallallahu Alaihivasallam ) Musalman Mardo se Keh dijiye k Apni nigaahe nichi rakhe aur Apni Sharmgaaho ki hifazat kare , Ye Unke liye zyada Pakeezgi ki Baat hai Beshak Allah Ta'ala usse khoob ba khabar hai Jo kuchh log Kiya karte hai'n  _",

*"_Surah An- Noor -Aayat 30_,*

┱_ Iske Baad Aurto'n ko Hukm farmaya :-

"__ Aur Musalman Aurto'n se farma dijiye k Apni Nigaahe nichi rakhe aur Apni Sharmgaaho ki hifazat kare aur Apni Zeenat ko zaahir na kare ,Magar Jo usme khula rehta Hai _,"

*"__Surah An-Noor -Aayat 31,*

┱_ In aayato mai Mardo'n aur Aurto'n dono Fareeq ko nazre nichi rakhne aur sharmgaah ki hifazat rakhne Ka Hukm farmaya, Parde ke Mukhtalifeen in Aayaat ke mafhoom ko jaanne se gurez karte hai'n , Zaahir hai k nazre nichi rakhne Ka Hukm isliye nahi Diya gaya k darakht aur Patthar aur Diwaaro aur gharo ke samaano ki taraf Dekhna hai balki hukm isliye hai k Nazar ki Galat istemal karne se Sharmgaah ki hifazat Khatre mai pad jati hai , isliye to iske Saath sharmgaah ki hifazat karne Ka hukm farmaya, Nafs aur Nazar ki lazzat ke liye Shohar ko Bivi ke liye aur Bivi ko Shohar ke liye makhsoos Kar diya gaya hai , Mahram Mard aur Aurat go ek doosre ko Hudood ke andar dekh sakte hai'n, Lekin unko bhi ek doosre per shehwat ki Nazar daalna Jaa'iz nahi ,Mahramo ko bhi Badan Ka hissa Dekhna Jaa'iz nahi hai , isme bhi Tafseel Hai ( Jo aage aayegi in Sha Allah )

┱ _ Hazrat Jareer bin Abdullah Raziyallahu Anhu ne arz Kiya :- Ya Rasulallah Sallallahu Alaihivasallam ! Agar Achanak ( na Mahram per ) Nazar pad Jaye to iske bare mai Kya irshad hai ?

Huzoor Aqdas Sallallahu Alaihivasallam ne irshad farmaya k Pehli Nazar ke Baad Doosri Nazar mat daale rakho , Kyunki Pehli Nazar per tujhe gunaah na hoga ( isliye k Wo bila akhtyar thi ) aur Doosri Nazar Tere Liye Halaal nahi hai ( us per pakad hogi , Kyunki wo akhtyar se hai ) _,"

* Mishkaat Sharif _,"*

┱_ Matlab ye hai k agar bila akhtyar kisi na Mahram per Nazar pad gayi to foran hata lo , agar nazar na hatayi aur dekhte rahe to ye do nazre shumaar hongi aur Doosri Nazar akhtyar wali Nazar hogi Jis per pakad aur mu'akhza hona zaahir hai , Be Pardgi mai Bad nazri ke Bahut se muzahire Hote hai'n, Mard aur Aurat Sab iska irtkaab karte hai'n , Nazre mehfooz hongi to Sharmgaah mehfooz hogi aur khud Buri Nazar ko bhi to Zina qaraar diya Hai ,

┱_ Baaz Zaahil ye kehte hai'n k Aayate Sharifa *َّ إِلَّا مَا ظَهَرَ مِنْهَا _* hai isme chehra aur Haatho Ka istashna hai Yani Aurte'n isko khula rakh sakti hai'n, in logo ko pata nahi Aayat ki Tafseer mai mufassireen ke Kya Kya Aqwaal hai'n , ( in Sha Allah Agle part mai )

╨───────────────────── 
*┱✿, illaa ma Zahara Minha Ki Tafseer _*

┱ _ Hazrat ibne Masoud Raziyallahu Anhu ne farmaya k isse ouper ke do Kapde muraad hai'n Jo Parde ke Ahatmaam ke liye jism se lage hue Kapdo ke ouper Hote hai'n ,

"_ Sahibe Tafseer Mazhari Baizaavi se Naqal karte hue likhte hai'n k ye istashna Haalate Namaz ke mutalliq hai Yani Namaz ki haalat mai Chehra aur Dono haath gatto Tak agar Khule rahe to Namaz ho jayegi aur Namaz mai in dono A'aza ke khula rehne mai koi harj nahi hai aur Gair Mahram ke saamne Zeenat ke moqo per koi hissa kholne Ka zikr مَا ظَهَرَ مِنْهَا _mai nahi hai, Fir Sahibe Tafseer Mazhari likhte hai'n k Agar مَا ظَهَرَ مِنْهَا se Zeenat ke moqe muraad hoto zaruratan majboori ke liye izhaare Zeenat ke iraade ke bager Jo hissa zaahir ho Jaye uska istashna kiya gaya Hai , fir likhte hai'n k Azaad Aurat ke chehra aur dono Haatho ke poshida rakhne Ka istashna Sirf Namaz ke liye hai Kyunki famane Khudawandi se Saaf zaahir hai k Aurat Apna Chehra Na Mahram ke saamne nahi khol sakti.

┱_ Hazrat Abdullah bin Umar Raziyallahu Anhu ne  مَا ظَهَرَ مِنْهَا , Ki Tafseer karte hue farmaya k Aurat Apna Chehra aur Dono Haatho ki hatheliya'n khole reh sakti Hai , Agar is Tafseer ko maana Jaye tab bhi Gair Mahram ke saamne kholne Ka koi zikr nahi , Jo log is istashna se Aurto'n ke liye Aam Tor per Chehra khole hue firne Ka javaaz Saabit Karna chahte hai'n Woh nihayat Galti per hai'n , Kyunki in Alfaz mai na Mahram ke saamne kholne Ka koi zikr nahi hai , Aayat mai " illaa ma Zahara Minha " farmaya hai " illaa ma Azharna " nahi farmaya ,Jisse Saaf zaahir hai k Aurat ko qasdan aur iradatan Na Mahram ke saamne Chehra kholne ki ijazat nahi di gayi ,

┱_ Fayl Laazim Ka Seega is Baat ko batla raha hai k agar Koi Aurat Namaz ki mashgooli mai ya Kaam kaaz ki Masrufiyat mai ya kisi aur majboori ki vahah se Chehra khole to Gair Mahram ko Jaa'iz nahi k Woh uske Chehre ko taakta rahe , Kyunki isse pehli hi Aayat mai Mardo'n ko nazre past rakhne ki Takeed ki gayi hai , Baad mai Aurto'n ke mutalliq Ahkaam like kiye , Mardo'n ko nazre past rakhne Ka Jo Hukm diya gaya Hai usse Jaha'n baazaro aur Raasto mai Aurto'n per Nazar daalne ki muma'anat Saabit Hui hai Wahi ye bhi Saabit hua hai k Aurte'n agar Chehra khole hue Kaam kaaz mai mashgool ho ya Parda hi nahi karti ho to Jo Mard unke Mahram nahi hai'n Unko qasdan aur iradatan Nazar daalna Mana hai ,

┱_ Surah Noor ki Aayaat ki humne mazeed tasreeh v tauzy isliye ki hai k Qur'an se Parda aur Ahkaame Parde Ka saboot maangne walo ko  Apni Kam aqli Ka ilm ho Jaye ,Ayaate baala mai Avval Aankh nichi rakhne Ka Hukm diya hai , fir Aurto'n ko farmaya k Zeenat aur Zeenat ke moqo per Poshida rakhne Ka ahatmaam Kare ,Ye Baat ki na Mahram ke saamne Chehra khole rahe aur Na Mahram unko dekha Kare ,Aayat se Saabit Karna Sakht nadaani hai , ( Wallahu A'alam )

╨───────────────────── 
*┱✿ Aurto'n Ko Ghar mai Rehne Ka Hukm _*

┱ _ Surah Al- Ahzaab ,Aayat -32-33, Mai Ummahatul Momineen Raziyallahu Anhum se irshad hai :-

*_يَا نِسَاءَ النَّبِيِّ لَسْتُنَّ كَأَحَدٍ مِّنَ النِّسَاءِ إِنِ اتَّقَيْتُنَّ فَلَا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ وَقُلْنَ قَوْلًا مَّعْرُوفًا_,*

*_وَقَرْنَ فِي بُيُوتِكُنَّ وَلَا تَبَرَّجْنَ تَبَرُّجَ الْجَاهِلِيَّةِ الْأُولَىٰ وَأَقِمْنَ الصَّلَاةَ وَآتِينَ الزَّكَاةَ وَأَطِعْنَ اللَّهَ وَرَسُولَهُ*

"__Ey Nabi Sallallahu Alaihivasallam ki Biviyo'n ! Tum mamooli ki tarah nahi ho agar tum Taqwa akhtyar Karo , Pas Tum ( Na Mahram Mard se ) bolne mai ( Jabki zaruratan bolna pade ) nazakat mat Karo , Kyunki isse ese Shakhs ko Meelane Qalbi ho jayega Jiske Dil mai Rog ho ( balki ) Tum qaa'ida ke Muwafiq Baat Karo ( Jese Paak Baaz Aurte'n akhtyar karti hai'n ) aur Tum Apne gharo mai raho aur Zamana e qadeem Ki Jahalat ke dastoor ke Muwafiq mat firo aur Tum Namaz ki Pabandi rakho aur Zakaat Ada Karo aur Allah aur uske Rasool Sallallahu Alaihivasallam ki farmabardari Karo _,"*

┱_ in Aayaat mai Avval to ye hukm diya gaya Hai k kisi Na Mahram se zaruratan Baat Karni pade to Guftgu ke andaz mai nazakat aur lahja mai Jazbiyat ke Tareeqe per Baat na kare , Jis tarah chaal dhaal aur raftaar ke andaz se Dil khichte hai'n , isi tarah guftaar ke nazakat wale Andaz  ki taraf bhi kashish hoti Hai , Aurat ki Awaaz mai Fitri Tor per Narmi aur lahja mai dilkashi hoti Hai , Paak Nafs Aurto'n ki ye Shaan hai k gair Mahram Mardo'n se Baat karne mai ye Esa lahja akhtyar kare Jisme khushunat aur rookhapan ho Taki kisi Bad Baatin Ka Qalbi meelan na hone paye ,

┱_ Doosra Hukm ye irshad farmaya k Tum Apne gharo mai raho , isse maloom hua k Aurto'n ke liye Shab v Roz Guzaarne ki Asal jagah Unke Apne Ghar hi hai'n , Shar'an Jin zarurato ke liye Ghar se nikalna Jaa'iz hai Parde ke khoob ahatmaam ke Saath Ba qadre zarurat nikal sakti hai'n , Bager zarurat Parde ke Saath bhi Bahar nikalna Achchha nahi hai , Jaha'n Tak ho sake Na Mahram ki nazro se Libaas bhi Poshida rakhna chahiye ,
  
╨───────────────────── 
*┱✿ Jahaalat Ke Zamane Ke Dastoor ke Mutabiq Firne Ki muma'anat _*

┱ _Hadees Paak mai ( Jo pichhle Part mai guzri )  Teesra Hukm ye Diya gaya Hai k Zamana qadeem ki Jahaalat Ke Mutabiq fira mat Karo , Zamana e qadeem ki Jahaalat Ka matlab Arab ki wo Jahaalat Hai Jo Huzoor Aqdas Sallallahu Alaihivasallam ki ba'asat se pehle Arab ke Rivaaj aur Samaj mai Jagah Pakde hue thi , Us Zamane mai Aurte'n be hayaai aur be sharmi ke Saath bila jhijhak Bazaaro mai aur Melo mai aur gali kooncho mai be Parda ho Kar ban than kar fira karti thi ,Sar per ya Gale mai Faishion ke liye dupatta daal liya ,na usse Seena Dhaka na Kaan ,na Chehra chhupaya , Mardo'n ki bheed mai ghus Jana , na Apne Paraye Ka imtiyaz, na gair Mahramo se bachne ki fikr ,

*"_ Ye Jahaalat Ke Rivaaj Aaj bhi islaam Ka Daava karne wali Aurto'n mai Jagah le chuka hai aur isko Taraqqi Ka naam dena chahte hai'n ,

┱_ Baaz log ye Sawal uthate hai'n k in Aayaat mai Ummahatul Momineen Raziyallahu Anhum ko Khitaab hai fir Aap doosri Musalman Aurto'n per is qanoon ko Kyu laagu karte hai'n ? Ye Sawal Shari'at Ka poora ilm na hone ki vajah se uthaya Jata hai ,Agar Qur'an ke mizaaj se waaqif Hote to maloom hota k Qur'an Ka Khitaab Khaas aur Aam hua karta Hai , Hazraate Sahaba Kiraam,Khulfa e Rashideen , Aa'imma ,Salfe Saleheen Hamesha yahi samajhte aur kehte aaye hai'n k in Aayaat mai go Azwaaje Mutahraat ko Khitaab hai lekin ye Ahkaam Tamaam Aurto'n ke liye Aam hai , Ijmae Ummat aur Ahadees e Nabviya se you Amr Saabit Shuda hai  k in Aayaat Ka hukm Ummat ki Tamaam Maao'n ,Behno aur Betiyo'n ke liye Aam hai ,

┱_ Ek Moti samajh Wala insaan bhi ( Jisko Khuda Ka Khof ho ) in Aayaat se ye sochne per Majboor hoga k Jab Azwaaje Mutahraat Raziyallahu Anhum ko ye hukm hai k Apne gharo mai hi Raha Karo ,aur Jaahiliyat Owla ke dastoor ke Mutabiq Bahar na niklo ,Halanki unko Tamaam Momineen ki Maae'n farmaya gaya Hai , To Ummat ki Doosri Aurto'n ke liye be Parda Bahar nikalna, ghoomna  kese Durust hoga ?

*"__ Sharf aur Ahatraam ke baa'is Ummat ki nazre Jin Muqaddas Khawateen per nahi pad sakti thi jab unko bhi Gharo mai rehne Ka hukm diya gaya Hai to Jin Aurto'n ki taraf qasdab nazre uthayi jati ho aur khud ye Aurte'n bhi Mardo'n ko Apni taraf maa'il karne Ka iraada rakhti ho Unko Jahaalat Ke Zamane ki tarah Baahar nikalne ki kese ijazat hogi ? Aayate Kareema mai Jo Ahkaam Mazkoor hai'n fasaad ke Raasto ko band karne ke liye hai'n aur zaahir hai k Doosri Aurte'n fasaad se rokne ki zyada Mohtaaj hai'n , Fir Aam Aurto'n ko in Ahkaam se mustashna Karna Jahaalat nahi to aur Kya hai ? 
  
╨───────────────────── 
*┱✿ Surah Ahzaab Mai Ummat Ki Tamaam Aurto'n Ko Parde Ka Hukm Diya Gaya Hai _*

┱ _  *"Surah Al-Ahzab, Aayat 59_,mai ye bhi irshad Hai:----*

*_يَا أَيُّهَا النَّبِيُّ قُل لِّأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِن جَلَابِيبِهِنَّ_,*

"__Ey Nabi ( Sallallahu Alaihivasallam ) Aap Apni Biviyo'n se aur Apni Sahabzaadiyo se aur Musalmano ki Aurto'n se farma dijiye ( K jab majboori ki Bina per Gharo se baahar Jana pade to ) Apne ( Chehro ke ) ouper ( bhi ) chaadaro Ka hissa latka liya Karo __,"

┱_ Is Aayat se Chand Umoor Saabit hue :- Avval ye k Aap Sallallahu Alaihivasallam ki Biviyo'n aur Sahabzaadiyo ke Saath digar Musalmano ki Aurto'n ko bhi poora Badan aur Chehra dhaank kar nikalne ke hukm mai Shareek farmaya gaya Hai, isse bhi un logo ki khaam khayali ki waaze Tor per tardeed ho gayi Jo ye Baatil daava karte hai'n k Parde Ka Hukm Sirf Aap Sallallahu Alaihivasallam ki Azwaaje Mutahraat ke liye makhsoos tha ,

┱_ Doisri Cheez Jo is Aayat se Saabit ho rahi Hai Wo Parde ke liye Chehre per Chaadar latkane Ka hukm hai , isse un Jaahil aur gumraah logo ke daavo ki bhi tardeed ho gayi Jo kehte hai'n k Aurto'n ko Chehra chhipa Kar nikalne Ka hukm ialam mai nahi hai ,

┱_ Tafseer ibne Kaseer mai Hazrat ibne Abbaas Raziyallahu Anhu Ka irshad Naqal farmaya gaya Hai k :- Allah Ta'ala ne Momineen ki Aurto'n ko Hukm diya hai k jab majboori se gharo se nikle to un chaadaro se Chehre ko dhaank le Jo Saro ke ouper badi Chaadar Odh rakhi hai'n aur Raah chalne ke liye Sirf ek Aankh zaahir kare _,"

┱ _  Teesri Jo Cheez is Aayat se waaze ho rahi Hai Wo Parde ke liye " Julbaab ( Badi Chaadar) " ke istemal karne Ka hukm hai , Chaadar lapetne Ka Rivaaj Baaz ilaaqo ki Aurto'n mai ab Tak hai k Jism per pehne hue Kapdo per Chaadar lapet leti hai'n aur is tarah Chehre per bhi uska ek hissa latka leti hai ,Burqa isi ki Taraqqi yafta ek shakl hai ,Burqe ki nisbat ye kehna k Shari'at e islamiya mai iski Koi asal nahi hai sarasar Jahaalat hai ,is Chaadar latkane se Burqe Ka saboot bhi is Aayat mai ho raha hai ,
  
╨───────────────────── 
*┱✿ Parde Ke Mutalliq Ek Galat Fahmi Ki Tardeed -_*

┱ _ Baaz log ye bhi kehte hai'n k Parde Ka Hukm to islam mai hai Lekin Chehre Ka Parda nahi Hai , in nadaano ki samajh mai ye bhi nahi aata k agar Chehre Ka Parda nahi Hai to Mardo aur Aurto'n ko nazre nichi rakhne Ka Hukm Kyu hai ? Chehre hi mai to kashish hai , Surah Ahzaab ki Ayaat se Chehre dhaankne Ka waaze hukm maloom ho raha hai ,

┱_ Baaz Logo ko Namaz ke masle se dhokha hua hai, Aurat Ka Satar Namaz ke liye itna hai k Chehra aur gatto Tak dono haath aur Takhno Tak dono qadmo ke alawa poora Jism Kapde se dhankha hua rahe k Baal aur khaal achchi tarah Chhup Jaye , Fuqha ki Kitaabo mai ye Masla Namaz ke Bayan mai likha hai Parde ke Bayan mai nahi likha , Moonh khol kar Namaz ho Jane ke jawaz se gair Mahram ke saamne be Parda ho Kar aane Ka saboot Dena badi bad dayanati hai ,

┱_ Durre Mukhtaar mai Jaha'n Sharaite Namaz mai ye Masla likha hai k Chehra aur hatheliya'n aur Paanv dhaankna sahate Namaz ke liye zaroori nahi hai ,Wahi ye bhi likha hai k :-
"__ Aur Jawan Aurato'n ko ( Na Mahram ) Mardo'n ke saamne Chehra kholne se roka jayega ( aur ye rokna ) is Vajah se nahi k Chehra ( Namaz ke ) satar mai dakhil hai balki isliye k ( Na Mahram ke saamne Chehra kholne mai ) Fitne ka Khof hai _,"

*_ Durre Mukhtaar ,Shaami - 1/284*
  
┱ _ * _ Shekh ibne Himaam Reh. Zaadul Faqeer mai Sharaite Namaz Bayan karte hue likhte hai'n :--

"__Fatawa Ki Kitaabo mai hai k mazhab Sahih ye hai k Kaano se ouper (Yani Baal aur Sar ) khul Jane se Namaz faasid ho gayi aur Gair Mardo'n ke liye Kaano ke ouper Ka hissa aur Kaano ke niche Ka hissa Yani Chehra vagera Ke dekhne Ka ek hi hukm hai Yani dono hisso Ka Dekhna Haraam hai _,"

┱_ Bahut se log Namaz bhi padhte hai'n aur Apne ko Deendaar bhi samajhte hai'n aur Parde ko bhi maante hai'n Lekin Saath hi ye bhi kehte hai'n k Parde ke Sakht Ahkaam Molviyo'n ne ijaad kiye hai'n , Ese Log Bad Deen logo ki Baato se mutassir hai'n , Jin logo ke Dilo mai thoda Bahut islam se Talluq baqi hai unko Raahe Haq se Hatane ke liye Shaitaan ne ye nayi chaal chali hai k har ese hukm ko Jiske maanne mai Nafs raazi na hota ho Molviyo'n Ka tarasha hua Bata deta hai ,

┱_ Kaash ye log Apni mominana Zimmedari Ka Ahsaas karte aur Ulma e Haq se ghul mil kar Unke zaahir v Baatin Ka Jaa'iza lete aur Unke bataye hue Masa'il ke Dala'il maloom kar ke Apne nafso ko mutma'in karte , Ulma e Haq Apni taraf se kabhi bhi koi hukm ko tajveez Kar ke Ummat ke sar nahi mandhte aur na Wo esa karne Ka haq rakhte hai'n ,Baat Sirf itni si hai k Ulma e Haq ko Chunki Quran v Hadees ki tashrihaat aur Ahkaame Shara'i ki poori poori Tafsilaat maloom hai , Shara'i Pabandiya'n aur Azeemato se bhi waqif hai'n isliye tehriran v taqreeran Ahkaame Shara'i ki Hudood v Quyood aur Zaabte  se ummat ko agaah farmate rehte hai'n ,

*"_Ajeeb Tamasha hai Jis masle per Amal na Karna ho usse bachne ke liye Molvi Ka bahana pesh Kar dete hai'n , Halanki Namaz Roza vagera Ke Jin Masa'il per Amal karte hai'n wo bhi to Molvi hi ne bataye hai'n ,Lekin Chunki unse gurez karne ki Niyat nahi isliye unko Sahi maante hai'n , Maidaane Qayamat mai Jab peshi hogi to Kya ese bahano se bacha ja sakega ,

  ╨───────────────────── 
*┱✿ Musibat Ke Waqt Bhi Parda Laazim Hai _*

┱ _ Hazrat Qais bin bin Shamas Raziyallahu Anhu Ka Bayan hai k Ek Sahabiya Aurat Jinko Umme Khulad kaha Jata Tha Aap Sallallahu Alaihivasallam ki khidmat mai Haazir Hui , Unka beta ( kisi gazwe mai ) Shaheed ho gaya Tha , Jab Woh aayi to Apne Chehre per Naqaab daale Hui thi , Unka ye haal dekh Kar Kisi Sahabi Raziyallahu Anhu ne kaha k Tum Apne bete Ka haal maloom karne ke liye aayi ho aur Naqaab daale Hue ho ?

Hazrat Umme Khulad Raziyallahu Anha ne jawab diya k agar Bete ke bare mai musibat zada ho gayi hu'n to Apni Sharm v Haya kho kar hargiz musibat zada na banungi , ( Yani sharmo Haya Ka Chala esi musibat zada kar dene wali Cheez hai Jese bete Ka khatm ho Jana )  ,
Hazrat Umme Khulad Raziyallahu Anha ke poochhne per Huzoor Sallallahu Alaihivasallam ne jawab diya k Tumhare bete ke liye Do Shaheedo Ka sawab hai , 
Unhone arz Kiya- Ya Rasulallah Sallallahu Alaihivasallam Kyu ? 
Irshad farmaya - isliye k use Ahle Kitaab ne qatl Kiya hai _,"

* Abu Daowd- 1/336 ,*

┱_ Is Waqi'a se bhi un Magrib Parast logo ki tardeed hoti Hai Jo Chehre ko Parde se khaarij karte hai'n , aur ye bhi Saabit hota Hai k Parda Har haal mai Laazim hai , Ranj ho ya Khushi ,Na Mahram ke saamne be Parda ho Kar aana Mana hai ,Bahut se Mard aur Aurte'n is tarah Ka tareeqa akhtyar karte hai'n Jese Unke nazdeek Shariyat Ka koi qanoon musibat ke Waqt laagu hi nahi hai ,

┱_ Jab Ghar mai koi Maut ho Jaye to is Baat ko Jaante hue bhi k Noha Karna sakht Mana hai Aurte'n zor zor se noha karti hai'n,Janaza jab Ghar se Baahar nikal Jata hai to Aurte'n darwaze ke Baahar Tak uske pichhe chali aati hai'n aur Be Parda , Khoob Yaad rakho Gussa ho ya Razamandi, Khushi ho ya Musibat har haal mai Ahkaame Shari'at ki pabandi Laazim Hai ,

╨───────────────────── 
*┱✿ Ilaaj Karane mai Parde Ka Ahatmaam Waajib Hai _*

┱ _ Hazrat Jaabir Raziyallahu Anhu se Rivayat Hai k Ummul Momineen Hazrat Umme Salma Raziyallahu Anha ne Huzoor Aqdas Sallallahu Alaihivasallam se Seengi lagwane ki ijazat Talab ki , Lihaza Aap Sallallahu Alaihivasallam ne Abu Tayba Raziyallahu Anhu ko Hukm diya k Umme Salma ( Raziyallahu Anha ) ko Seengi laga de'n _,

Ye Waqi'a Bayan karne ke baad Hazrat Jaabir Raziyallahu Anhu ne farmaya k Abu Tayaba Raziyallahu Anhu se Jo Seengi lagwayi to mere Khayal mai iski vajah ye thi k Woh Hazrat Umme Salma Raziyallahu Anha ke doodh Shareek Bhai they ya Na- Baalig Ladke they _,"

* Mishkaat Sharif -268 Ba hawala Muslim _,*

┱_ Hadees Paak se maloom hua k Aurat ke ilaaj ke silsile mai bhi Parde Ka Khayal rakhna zaroori hai , Agar Muhalij ( Doctor ) ke saamne Be Parda ho Kar aa Jane mai koi harj na hota to Hazrat Jaabir Raziyallahu Anhu ko ye Kyu batana Padta k Abu Tayaba Hazrat Umme Salma Raziyallahu Anha ke doodh Shareek Bhai ya Na-Baalig ladke they , Hamare Zamane Ke logo Ka Ajeeb haal hai k Jin khandaano aur gharo mai Parde Ka ahatmaam hai ilaaj ke silsile mai Unke yaha'n bhi Parde Ka Khayal Chhod diya Jata hai ,

┱_ Hadees Paak se ye bhi Maloom hua k Aurat ke ilaaj ke liye Mahram ko talash Kare ,Agar Koi Mahram ilaaj karne wala na mile to Gair Mahram se bhi Parde ke Ahatmaam ke Saath ilaaj Kara sakte hai'n ,

╨───────────────────── 
*┱✿ Ilaaj Ke Moqe Per Satar Kholne Ke Ahkaam _*

┱ _ ilaaj karane mai Shari'at ke ek Aham usool " Majbooran Jitna badan Ka dekhna zaroori hai, ilaaj karne wala bas Usi qadar dekh Sakta Hai _," Maslan ilaaj ke liye nabz dekhne aur haal Kehne se Kaam chal Sakta ho to isse zyada dekhne ya haath lagane ki ijazat na hogi , isi tarah agar baazu ya pindli mai Zakhm hai to Jitni jagah badarja majboori ke Dekhne ki zarurat ho bas Usi qadar ilaaj karne wala dekh Sakta Hai , Agar ilaaj ki majboori ke liye Aankh ,Naak ,daant Dekhna hai to is Soorat mai poora Chehra kholne Jaa'iz nahi ,Jis qadar dekhne se Kaam chal Sakta ho bas Usi qadar dekha ja sakta Hai ,

"__Ye Tafseel ese Muhalij ke liye bhi hai Jo Mahram ho ,Mahram ke liye bhi Apni Mahram Aurat Ka Poora Badan Dekhna Jaa'iz nahi hai , Kyunki Aurat ko Apne Mahram ke saamne Pet aur Peeth aur Raan kholna Mana hai , Pas pet ya peeth mai zakhm ho to Hakeem ya Doctor Chahe Mahram ho ya Na-Mahram ho Sirf Zakhm ki jagah dekh Sakta Hai ,isse zyada Dekhna gunaah hai ,

┱_ Iski Soorat ye hai k Purana Kapda pehan Kar Zakhm ke ouper Ka hissa kaat diya Jaye Taki pet ya peeth ke baqi hisse per Nazar na pade , Aur Chunki Aurat ko naaf se le kar ghutno ke khatm Tak kisi Aurat ke saamne kholna bhi Jaa'iz nahi hai , isliye Ek Lady Doctor ko Maslan Raan ya Sureen Ka Foda vagera dikhana maqsood ho to is Soorat mai bhi Kapda kaat Kar Sirf Fode ki jagah dikhayi Jaye ,

"__ iske Saath ye bhi Yaad rakhna zaroori hai k zarurat ke liye Hakeem ya Doctor ko Jo jagah dikhayi Jaye to Haazreen mai Jo Azeezo Aqarib mojood ho Unko us jagah ke Dekhne ki ijazat nahi hai , Haa'n agar Haazireen mai se koi Shakhs esa hai Jise Shar'an us jagah Ka Dekhna Jaa'iz hai to Wo is pabandi se khaarij hai , Maslan Agar Pindli mai zakhm hai aur Doctor ko dikhana hai aur Aurat Ka Baap ya Haqeeqi Bhai bhi Waha mojood hai usne agar dekh liya to gunaah na hoga , Kyunki Pindli Ka kholna Mahram ke saamne Durust hai ,

*┱_ Faayda _* Ye Tafseel Jo zikr ki gayi hai Mard ke ilaaj ke silsile mai bhi hai Kyunki Naaf se Le kar Ghutne Tak Mard Ka Mard se Parda hai , Agar Raan ya Sureen Ka Zakhm kisi Doctor ko dikhana hai ya koolhe mai Majbooran injection lagwana hai to Sirf Doctor ba-qadar zarurat dekh Sakta Hai ,Doosre logo ko Dekhna Haraam Hai ,

*┱_ Masla _,* Hamal Ke Zamane mai agar Daa'i se Pet malwana ho to naaf se niche Ka Badan kholna Durust nahi Hai , Chaadar vagera daal Leni chahiye ,bila zarurat koi jagah Daa'i ko bhi dikhana Jaa'iz nahi ,

╨───────────────────── 
*┱✿ Wiladat Ke moqe Per Be-Ahatyaati_*

┱ _ Bachcha Paida hone ke Waqt Daa'i aur Nurse ko Sirf ba-qadar zarurat Paidaish ki jagah dekhna Jaa'iz hai ,isse zyada dekhna mana hai aur aas paas Jo Aurte'n mojood ho Agarche Maa'n ,Behan hi ho Unko bhi Dekhna Mana hai Kyunki unka Dekhna bila zarurat Hai, Lihaza unko Nazar daalne ki ijazat nahi , ye Jo dastoor hai k Aurat ko nanga Kar ke daal dete hai'n aur Sab Aurte'n dekhti rehti hai'n ye Haraam hai ,

*┱_ Masla_,* Agar Gair Muslim Daa'i ya Nurse Bachcha Paida karne ke liye bulayi Jaye to uske saamne sar kholna Haraam hai , Kyunki Kaafir Aurat ke saamne Musalman Aurat Sirf moonh aur Pahuncho Tak dono haath aur Takhno se niche dono Payr khol sakti Hai, inke alawa ek Baal Ka kholna bhi Durust nahi, gair Muslim Aurte'n Maslan Bhangan ,Dhoban ,Nurse ,Lady Doctor vagera Jo bhi ho un sabke mutalliq yahi hukm hai ,

┱_ Baaz Jadeed Taleem Yaafta Logo mai ye Rivaaj hai k Bajaye Nurse ya Daa'i ke Mard Doctors se Bachcha janwaate hai'n ,Jabki Apni humJins ko bhi Apni jins ke Satar ki taraf bhi bila zarurat Nazar daalna mamnu hai to Gair jins ke liye kese Jaa'iz ho Sakta Hai , Musalman Aurat ki humJins qareeb Musalman Aurat hai , Sabse pehle zarurat ke Waqt usko akhtyar hai Uske Baad Kaafir Aurat hai , Uske baad agar Doctor ki zarurat hi aa pade to Musalman Doctor ko akhtyar hai ,Wo bhi na ho to Kaafir ki taraf ruju Kiya Jaye ,

"__ Baaz Aurte'n Choodi bechne Walo se ya Dukaandaaro se Choodiya'n Pehanti hai Jiski vajah se Uske haath mai Haath Dena Padta hai , Ye Gunaah hai , Chunki esa karne ki koi majboori nahi Hai  isliye  isse parhez Karna Laazim hai ,
  
╨───────────────────── 
*┱✿ Susraal Wale Mardo'n Se Parde Ki Sakht Takeed _*

┱ _ Hazrat Uqba bin Aamir Raziyallahu Anhu se Rivayat Hai k Rasulullah Sallallahu Alaihivasallam ne irshad farmaya k ( Na Mahram ) Aurto'n ke paas mat Jaya Karo ,

Ek Shakhs ne arz Kiya - Ya Rasulallah Sallallahu Alaihivasallam ! Aurat ki Susraal ke Mardo'n ke mutalliq Kya Hukm hai ? 
Aap Sallallahu Alaihivasallam ne irshad farmaya k Susraal ke Rishtedaar To Maut Hai'n _,"

* Mishkaat- 268 Ba hawala Bukhari v Muslim ,*

┱_ is Hadees mai Jo Sabse Zyada qabile tavajjoh Cheez hai Wo ye hai k Aap Sallallahu Alaihivasallam ne Aurat ke Susraal ke Mardo'n ko Maut se Tasbeeh di hai , Jiska Matlab ye hai k Aurat Apne Jeth aur Dever aur Nando'i vagera se aur isi tarah Susraal ke doosre Mardo'n se gehra Parda Kare , Yu'n to har Na Mahram se Parda Laazim hai lekin Jeth Dever aur Nando'i aur Doosre Rishtedaro ke saamne aane se is tarah bachna zaroori hai Jese Maut se bachne ko zaruri Khayal karte hai'n ,

┱_ iski Vajah ye hai k in logo ko Apna samajh Kar andar bula liya Jata hai aur be takalluf Jeth Dever aur Shohar ke Azeezo Aqarib andar chale aate hai'n aur Bahut se Zyada khula Mila karte hai'n aur Hansi Dillagi Tak nobat aa jati hai, Shohar ye samajhta hai k ye to Apne log hai'n Unse Kya rok tok ki Jaye , Lekin kabhi kabhi Baat Bahut aage chali jati hai aur Sharmindgi uthani padti hai ,

*"__Tambeeh _,_ Parda Haq e Shara'i hai Shohar ka Haq nahi Hai , Bahut si Aurte'n samajhti hai'n k Shohar Jis Aadmi se Parda karaye ya Susraal Wale jisse Parda karaye usse Parda Karo aur Shohar ya Susraal Wale Jiske saamne aane ko Kahe uske saamne aa jao ,Ye Sarasar Galat hai , Shohar ho ya Koi doosra Shakhs uske Kehne se gunaah karne ki ijazat nahi ho jati , Khoob samajh lo _,"*

╨───────────────────── 
*┱✿ NaBeena se Parde Ka Hukm , _*

┱ _ Ummul Momineen Hazrat Umme Salma Raziyallahu Anha farmati hai'n k Mai aur Memuna Raziyallahu Anha Hum dono Rasulullah Sallallahu Alaihivasallam ke paas they k Achanak Abdullah bin Umme Maktoom Raziyallahu Anhu saamne se aa gaye aur Rasulullah Sallallahu Alaihivasallam ke paas aane lage , ( Chunki Abdullah ibne Maktoom Raziyallahu Anhu NaBeena they isliye hum dono ne unse Parda karne Ka iraada nahi kiya aur isi tarah Apni jagah bethi rahi'n ) ,

Rasulullah Sallallahu Alaihivasallam ne irshad farmaya k unse Parda Karo , 
Maine arz Kiya- Ey Allah ke Rasool Sallallahu Alaihivasallam Kya Woh NaBeena nahi hai ? Humko to Woh nahi dekh rahe hai'n ,

Iske Jawab mai Rasulullah Sallallahu Alaihivasallam ne irshad farmaya- Kya Tum dono ( bhi ) NaBeena ho ? Kya tum unko nahi dekh rahi ho ?_,"

* Mishkaat -269 Ba hawala Ahmad v Tirmizi v Abu Daowd )*

┱_ Hadees se maloom hua k Aurte'n bhi Jaha'n Tak Mumkin ho sake Mardo'n per Nazar na daale , Hazrat Abdullah ibne Maktoom Raziyallahu Anhu NaBeena,Paakbaaz Sahabi they aur Aap Sallallahu Alaihivasallam ki dono Biviya'n Nihayat Paak Daaman thi ,iske bavjood bhi Aap Sallallahu Alaihivasallam ne dono Biviyo'n ko Hukm farmaya k Hazrat Abdullah ibne Maktoom Raziyallahu Anhu se Parda Kare , Yani un per Nazar na daale ,

┱_ Dekhiye , Jaha'n Bad nazri Ka Zara bhi ahatmaal na Tha Waha'n bhi is qadar Sakhti farmayi gayi ,to Aaj Kal ki Aurto'n ke liye kese ijazat ho sakti Hai k Mardo'n ko jhaanka Taaka Kare , bila akhtyar Nazar pad gayi Wo Alag Baat hai lekin iradatan v qasdan Mardo per Nazar daalna Mana hai ,Aayat pehle guzar chuki hai Jisme Mardo'n aur Aurto'n ko Nazar past karne Ka hukm farmaya gaya Hai ,

╨───────────────────── 
*┱✿ Bad Nazri Sababe Laanat Hai _*

┱ _ Hazrat Hasan Basri Rehmatullah Alayhi ne farmaya k Mujhe ye Hadees Pahunchi hai k Rasulullah Sallallahu Alaihivasallam ne irshad farmaya k Allah Ta'ala ki Laanat ho dekhne wale per aur Jiski taraf dekha Jaye us Per Bhi _,"

* Mishkaat- 27 Ba hawala Bayhiqi Fi Shoebul imaan _,*

┱_ Ye Hadees Bahut si Juziyaat per Haawi hai , Jisme bator qaa'ida Kulliya ke har Nazare Haraam ko Laanat ki mustahiq bataya hai aur na Sirf dekhne wale per Laanat bheji balki Apni Khushi aur akhtyar se jo koi bhi Mard Aurat kisi Esi jagah khada ho Jaye Jaha'n se Shari'at ke khilaf nazar daali ja sake , Ya Koi bhi Mard v Aurat kisi Mard v Aurat ke saamne wo hissa khol de ya khula rehne de Jiska Dekhna dekhne wale ke liye Halaal na ho to ye dikhane Wala bhi Mustahiq e Laanat hai ,

╨───────────────────── 
*┱✿ Na Mahram Mard Ke Saath Tanhayi mai Rehne Ki Muma'anat_*

┱ _ Hazrat Umar Raziyallahu Anhu se Rivayat Hai k Rasulullah Sallallahu Alaihivasallam ne irshad farmaya k koi Mard Jab Kisi Aurat ke Saath Tanhayi mai hota Hai to waha'n un dono ke alawa Teesra fard Shaytaan bhi Zaroor Mojood hota Hai _,"

* Mishkaat Sharif - 269 Ba hawala Tirmizi ,*

┱_ Shaytaan Ka Kaam maloom hi hai k Woh gunaah karata hai ,Jab bhi koi Mard gair Aurat ke Saath Tanhayi mai hoga to Shaytaan bhi waha mojood hoga Jo dono ke Jazbaat ko ubhaarega , aur Dono ke Dilo'n mai kharaab Kaam karne ke waswase daalega , isi vajah se Aap Sallallahu Alaihivasallam ne Sakhti ke Saath Gair Mahram ke paas Tanhayi mai rehne ki muma'anat farmayi , is per badi Sakhti se Amal karne ki zarurat hai ,Chaahe Ustaad ho , Ya Peer ho ,Ya Mamoozaad Fufizaad ,Chacha zaad ,Khaala zaad ho ,Unke paas Tanhayi mai rehne se Aurat ko parhez Karna Laazim hai , aur Mardo'n ko bhi Na Mahram Aurto'n ke Saath Tanhayi mai bethne uthne se bachne Ka ahatmaam Karna zaroori hai ,

╨───────────────────── 
*┱✿Mard Ka Mard se Aur Aurat ka Aurat se Kitna Parda Hai _*

┱ _ Hazrat Abu Saied Raziyallahu Anhu se Rivayat Hai k Rasulullah Sallallahu Alaihivasallam ne irshad farmaya k Koi Mard Kisi Mard Ki Sharmgaah ko na dekhe aur na koi Aurat Kisi Aurat ki Sharmgaah ko dekhe ,aur na nange ho Kar do Mard ek Kapde mai Lipte aur na Do Aurte'n ek Kapde mai nangi ho Kar Lipte _,"

* Mishkaat - 268 Ba hawala Muslim ,*

┱_ Is Hadees se maloom hua k Jis tarah Aurat Mard se Parda karti Hai Usi Tarah Aurat Ka Aurat se aur Mard Ka Mard se bhi Parda hai , Lekin Parde mai Tafseel hai ,

"__ Naaf se Le kar Ghutno ke khatm Tak Kisi bhi Mard ko Kisi Mard ki taraf dekhna Halaal nahi hai , Bahut se log Aapas mai zyada Dosti hone ki vajah se Parde ki jagah ek doosre ko dikha dete hai'n ,ye Sarasar Haraam hai ,

┱_ Isi tarah Aurat ko Aurat ke saamne Naaf se le kar ghutno ke khatm Tak kholna Haraam Hai aur Kaafir Aurat ke saamne moonh aur gatte Tak haath aur takhne Tak payr ke alawa Jism Ka koi hissa ya Koi Baal kholna bhi Durust nahi ,

*┱_Masla_ ,_ Jitni jagah mai Nazar Ka Parda hai utni jagah ko chhoona bhi Durust nahi Hai Chahe Kapde ke andar haath daal Kar hi Kyu na ho , Maslan kisi bhi Mard ko ye Jaa'iz nahi k kisi Mard Ke naaf se le kar ghutno Tak ke hisse ko haath lagaye , isi tarah koi Aurat Aurat ke naaf ke niche ke hisse ko ghutno ke khatm Tak haath nahi laga sakti , isi Vajah se Hadees mai do Mardo ko ek Kapde mai nange ho Kar let ki muma'anat farmayi hai aur yahi muma'anat Aurto'n ke liye bhi hai Yani do Aurte'n ek Kapde mai nangi ho Kar na lete _,"*

╨───────────────────── 
*┱✿ Shohar Ke Saamne Kisi Doosri Aurat Ka Haal Bayan Karne Ki Muma'anat _*

┱ _ Hazrat Abdullah bin Masoud Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Ek Aurat Doosri Aurat ke Saath Hum Majlis hone ke baad Apne Shohar ke saamne us Doosri Aurat Ka Poora poora haal ( Naak Naqsha aur Uska Husno Jamaal vagera Ka ) is tarah Bayan na Kare k Jese Wo Us Aurat ko dekh raha hai _,"

* Mishkaat Sharif - 268 Az Bukhari v Muslim ,*

┱_ Matlab ye hai k Apne Shohar ke saamne kisi Baat ke silsile mai Yu hi agar kisi Aurat Ka zikr aa Jaye to uske saamne uska poora poora haal is tarah Bayan na Kare k jise sun Kar us Aurat ke Husno Jamaal aur Khado khaal Ka Naqsha Shohar ke zahan mai aa Jaye , Kisi Aurat Ka esa Saaf Saaf aur waaze haal Ka Bayan Mard ke saamne Karna bhi ek tarah ki be pardgi hai ,Jese kisi ko Aankh se dekh Kar Tabiyat maa'il ho jati hai ese hi bager dekhe Husno Jamaal Ka haal sun Kar Dil mai umang paida ho jati hai aur usko dekhne mulaqaat karne ko Dil chahne lagta hai,

┱_ Lihaza is tarah ke tazkire se bhi Mana farmaya gaya Hai aur isme Bayan karne wali ke nuqsaan Ka bhi Andesha hai Kyunki Apna Shohar agar us Aurat ko haasil karne ke chakkar mai pad gaya to pachhtana padega _,

╨───────────────────── 
*┱✿ Na Mahram Aurto'n se Musafa ( Haath Milana ) Karne ki Muma'anat  _*

┱ _ Hazrat Umaymah binte Ruqayqah Raziyallahu Anha Ka Bayan hai k Mai'n aur Chand digar Aurte'n Aap Sallallahu Alaihivasallam ki khidmat mai Bayte islam ke liye Haazir Hui ,

"_ Aurto'n ne arz Kiya- Ya Rasulallah Sallallahu Alaihivasallam ! Hum Aapse in sharto per Bayt hoti hai'n k Allah ke Saath kisi Cheez ko Shareek na karengi aur chori na karengi aur Zina na karengi aur Apni Aulaad ko qatl na karengi aur koi Bohtaan ki Aulaad na laadengi Jise Apne Haatho aur Paanv ke darmiyan daale ,( aur Apne Shohar ki Aulaad bataye ) aur Nek Kaam mai Aapki na farmani na karengi ,"

"_ Ye Sun Kar Aap Sallallahu Alaihivasallam ne farmaya k ye aur Keh lo k Hum Apni Taaqat ke mutabiq poora Amal karengi ," 
Ye sun Kar un Aurto'n ne arz Kiya - Allah aur Uske Rasool ( Sallallahu Alaihivasallam ) hum per isse zyada Meharban hai'n Jitna hum Apne nafso per Raham karte hai'n ,
Iske Baad un Aurto'n ne arz Kiya - Ya Rasulallah Sallallahu Alaihivasallam ! ( Zubaani iqraar to humne Kar hi liya hai ) Laaiye ( Haatho mai Haath de Kar bhi ) Aap se Bayt Kar le ,

Ye Sun Kar Huzoor Aqdas Sallallahu Alaihivasallam ne farmaya - Mai'n Aurto'n se Musafa nahi karta ( Jo maine Zubaan se Keh diya sabke liye Laazim ho gaya aur Alag Alag Bayt karne ki zarurat bhi nahi hai , Kyunki ) So Aurto'n se ( bhi ) Mera Wahi kehna hai Jo Ek Aurat se Kehna hai _,"

* Mota imaam Maalik - 6/449_,*

┱_ Hazrat Ayesha Raziyallahu Anha bayan farmati hai'n k Momin Aurto'n mai se Jisne Un Sharto Ka iqraar Kar liya ( Jinka guzishta hadees mai zikr hai ) to usko Huzoor Aqdas Sallallahu Alaihivasallam ne Zubaani farma diya k maine tujhe Bayt Kar liya ( Kyunki haath mai Haath le kar Aap Sallallahu Alaihivasallam Aurto'n ko Bayt nahi farmate they ) Khuda ki qasam ! Aap Sallallahu Alaihivasallam ke haath ne Bayt karte Waqt ( bhi ) kisi Aurat Ka haath na chhuwa ,Aap Sallallahu Alaihivasallam Aurto'n ko Sirf Zubaani Bayt farmate they, Aap Sallallahu Alaihivasallam Ka irshad hota tha Maine tujhe Bayt Kar liya _,"

* Sahih Bukhari -2/ 726 _,*

┱ _ Ab Zara hum Apne Zamane ke naamo nihaad Peero aur Jaahil Murshido ki bad haali Ka bhi Jaa'iza le ,Ye Peeri ke Jhoote mudda'i Mureed Aurto'n mai Parde ke Ahatmaam ke bager yu hi ghus Jate hai'n aur Mureed karte Waqt haath mai Haath bhi lete hai'n , Jiski vajah se Umuman ese Waqi'aat pesh aa Jate hai'n Jinka pesh aana be pardgi aur be sharmi ke Baad zaruri ho jata Hai , Bhala ese Faasiq log is laa'iq kese ho sakte hai'n k koi Musalman unko Apna peer banaye , Hargiz nahi ,

*┱_ Tambeeh_,*_ Jo Mard Aurat Aapas mai Mahram ho ek doosre ke un A'aza e Jism ko chhoo bhi sakte hai'n Jinko Shar'an dekhna Durust ho , aur Aapas mai Musafa bhi Kar sakte hai'n Basharte k kisi ke mutalliq Shehwat Ka Andesha na ho aur Gair Mahram Aurto'n se Musafa Karna durust nahi Hai Agarche bila shehwat ho , Urope v America ke Tor Tareeqo per Aaj Kal logo mai Jo ye dastoor hai k Dawat aur Partiyo'n mai Apni Biviyo'n ko Saath le kar Jate hai'n aur Doosro ki Aurto'n se khud Musafa karte hai'n aur Apni Aurto'n se bhi na Mahram Mardo se Musafa karate hai'n ye Haraam hai ,  
╨───────────────────── 
*┱✿ Hamaamo Aur Talaabo mai Gusl Karna _*

┱ _ Hazrat Jaabir Raziyallahu Anhu se Rivayat Hai k Rasulullah Sallallahu Alaihivasallam ne irshad farmaya k Jo Shakhs Allah per aur Aakhirat Ke din per imaan rakhta ho us per Laazim hai k Bager Tahmad ke hamaam mai na dakhil ho aur Jo Shakhs Allah per aur Akhirat ke din per imaan rakhta Hai kisi ese dastarkhwan per na bethe Jis per Sharaab Ka Daur chal raha ho _,"*

* Mishkaat - 384 Az Tirmizi v Nasaa'i ,*

┱_ Jo Qaume Nabi Kareem Sallallahu Alaihivasallam ki Hidaya se mehroom hai'n Haya v Sharm se Khaali hai'n , insaan Ka Nafs sharmo Haya ki pabandi se bachta hai isliye Jo Deene Haq ke Paband nahi hote Sharm v Haya se bhi azaad Hote Hai'n , Mil jul Kar Mardo Aurato'n Ka nahana aur Parde Ka Ahatmaam na Karna Jahiliyat ke Zamane mai bhi tha aur Aaj Jadeed Tehzeeb yafta log Jaahil ( Modern ) logo mai bhi hai ,

┱_ Hamare is Zamane mai Club banane aur uska member banane Ka Rivaaj hai , inhi Clubo mai baaz nahane ke aur Baaz terne ke banaye Jate hai'n, Mard Aurar Ladke Ladkiya'n ikatthe mil Kar nahate hai'n aur tertr hai'n , Mardo'n Aurto'n ke Nange Jismo ki be pardgi hoti Hai, is tarah ke club Urope ke be sharmo ki ijaad hai ,Magar Afsos hai k Musalman hone Ka daava karne wale bhi is tarah ke Clubo ke member banne ko badi Baat samjhne lage hai'n ,

┱_Huzoore Aqdas Sallallahu Alaihivasallam ne ek Shakhs ko dekha k Khule mai Gusl Kar raha hai ( uske Baaz A'aza khule hue they ) use dekh Kar Aap Sallallahu Alaihivasallam Mimbar per tashreef laye aur Allah ki hamdo Sana ke Baad farmaya k bila shubha Allah Ta'ala Sharm Wala Hai aur Parde ko pasand farmata hai , Lihaza tumme se jab koi Shakhs Gusl Kare to Parde mai Kiya Kare _,"

* Abu Daowd Sharif _,*

╨───────────────────── 
*┱✿ Dastarkhwan Per Sharaab_*

┱ _ Aap Sallallahu Alaihivasallam ne Hamaam mai Gusl karne ki muma'anat ke Baad Doosri Nasihat ye farmayi hai k Jo Shakhs Allah per aur Akhirat ke din per imaan rakhta ho kisi ese dastarkhwan per na bethe Jis per Sharaab Ka Daur chal raha ho , Hamare is Zamane mai Jis tarah be pardgi ko Taraqqi kaha Jane laga hai aur edi choti Ka zor laga rahe hai'n k kisi tarah be pardgi Aam ho Jaye ,

"_ isi tarah se bade bade Ohde daar log Jo Urope aur America ke mahol mai Kuchh din Guzaar chuke hai'n Sharaab ke pine aur pilane ko Partiyo'n aur Dawato Ka hissa samajhte hai'n un logo ko Sayyadna Hazrat Muhammad Sallallahu Alaihivasallam ke itteba mai Taraqqi nazar nahi aati balki Urope aur America ke be Haya insaano ki taqleed mai urooj samajhte hai'n ,Allah ke Rasool Sallallahu Alaihivasallam ne to ye farmaya k Jis dastarkhwan per Sharaab Ka Daur chal raha ho us per mat betho ,

┱_ Hazrat Abdullah bin Umar Raziyallahu Anhu se Rivayat Hai k Rasoole Khuda Sallallahu Alaihivasallam ne farmaya k Allah Ta'ala ki Laanat hai Sharaab pine wale per aur Uske pilane wale per aur Uske bechne wale per aur Uske khareedne wale per aur Uske banane wale per aur usko utha Kar Doosri jagah le Jane wale per aur Jiske Paas le Jaye us per bhi _,"

* Abu Daowd Sharif ,ibne Maaja _,*

┱_ Ek Hadees Paak mai irshad hai - Sharaab mat pi Kyunki wo Buraa'i ki kunji hai _," *( Mishkaat Sharif )*

"__ Ye har Buraa'i ki kunji un logo mai Jo Duniya ke aitbaar se ounche Tabqe mai shumaar hai'n Khoob pi aur pilayi jati hai, aur har Buraa'i Ka in logo se zahoor hota rehta Hai aur in per Jo Allah ki Laanat barasti hai usse bachne Ka Zara bhi Khayal nahi karte ,

╨───────────────────── 
*┱✿ Safar mai Aurat Ke Jaan v Maal aur Izzat ki hifazat ke liye Shari'at Ka ek Takeedi Hukm _*

┱ _ Hazrat Abu Huraira Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k kisi bhi Aurat ke liye Jo Allah per aur Akhirat ke din per imaan rakhti ho ye Halaal nahi Hai k Mahram ke bager ek Din ek Raat ki musafat Ka Safar Kare _,"

* Bukhari -1/148 _,"*

┱_ Hadees Paak mai Musalman Aurat ko ek Bahut hi Aham Hukm diya hai aur Wo ye hai k Ek Raat Ki musafat Ka Safar bager Mahram na Kare , Baaz rivayato mai Mahram ke bager akele safar ki muma'anat bhi vaarid hui hai , aur Baaz rivayato mai hai k Aurat ko teen din teen Raat Ka Safar bager Mahram ke mamnu hai , ahatyaat Ka taqaza yahi hai k qareeb Ka Safar ho ya Door Ka Aurat Bager Mahram ke na Jaye , Khususan is Zamane mai Jo fitno Ka Zamana hai , 

┱_ Waaze rahe k Ek Din ek Raat ki musafat se 16 meel aur Teen Din aur Teen Raat ki musafat 48 meel muraad Hai , Ahde Nabuwat mai Chunki Ounto se safar hota Tha aur Rozana ek Manzil Tay karte they Jo 16 meel ki hoti thi , isliye Safar ki musafat ko ek din ek Raat ya teen din teen Raat ki musafat Keh Kar bataya karte they , Tez raftaar car se Safar Kare ya Rail se ya Hawaii Jahaaz se 48 meel ( 77 kilometers ) Ka Safar Aurat ke liye bager Mahram Halaal nahi hai ,aur isse Kam Safar ho to gunzaish hai Magar ahatyaat Ka taqaza yahi hai k thode Bahut Safar ke liye bhi Aurat ko bager Mahram ke Jane se rokna chahiye ,

╨───────────────────── 
*┱✿ Aurte'n Raasto Ke darmiyan na Chale _*

┱ _ Hazrat Abu Usaid Ansari Raziyallahu Anhu farmate hai'n k Ek martaba Huzoor Aqdas Sallallahu Alaihivasallam Masjid se baahar tashreef la rahe they aur Mard v Aurat waha'n se Guzar rahe they , Raaste mai Mard v Aurat ( is tarah se ) mil Gaye ( k Sab ikatthe guzarne lage , aur Aurte'n ek taraf nahi thi , go Aurte'n Parde mai thi ,Magar Raaste ke darmiyan Mardo'n ke majme mai ja rahi thi )

Ye maajra dekh Kar Huzoor Aqdas Sallallahu Alaihivasallam ne farmaya k Ey Aurto'n ! Pichhe hato , Tumko Raaste ke bich mai chalne ki ijazat nahi hai, Tum Raaste ke Kinaaro per ho Kar guzro ,

Raavi kehte hai'n k is irshad ke baad Aurte'n Raaste ke Kinaaro mai Ese Tareeqe per guzarti thi k Raaste ke daaye baaye Jo koi Diwaar hoti thi usse chipki jati thi yaha'n Tak k unka Kapda Diwaar mai atakne lagta tha _,"

* Mishkaat -405 Az Abu Daowd v Bayhiqi ,*

┱_ Hadees Paak mai Aurto'n ko Mardo'n se door rehne ki Takeed farmayi Hai agar Aurat ko kisi majboori ki vahah se ghar se nikalna pade to khoob zyada Parde Ka Ahatmaam Kare aur Khushbu laga Kar na nikle aur jab Raaste se guzre to Raaste ke darmiyan na chale balki Kinaaro per chale , 

┱_ Yaha'n ye Baat qabile Zikr hai k Huzoor Aqdas Sallallahu Alaihivasallam ne Aurto'n ko iska hukm diya k Mardo'n se bach Kar aur Kinaaro per chale, Lihaza Musalman Aurto'n Ka ye Kehna Galat hai k Hum Jese Chahe chalenge , Mardo'n ko hatna hai to hat jayenge , 
  
*Baqi Hissa Agle part mai - , Soon in Sha Allah_,*
            
▦══─────────────══▦

*┱✿ Haya aur Imaan Laazim v Malzoom Hai'n _*

┱ _ Hazrat Abdullah bin Umar Raziyallahu Anhu se Rivayat Hai k Rasoole Akram Sallallahu Alaihivasallam ne irshad farmaya k bila shubha Haya aur Imaan dono Saathi hai'n , Pas Jab in dono mai se ek uthaya Jata Hai to Doosra bhi utha liya jata hai _,"

* Mishkaatul Masabeh-432 Az Bayhiqi,*

┱_ Haya Momin Bando ki Khaas Sifat hai , Jo Qaume Huzoor Aqdas Sallallahu Alaihivasallam ki taleem se door hai'n Haya aur Sharm se unko kuchh waasta nahi , Haya aur Imaan dono Laazim v Malzoom Hai'n, Ya dono rahenge ya dono Rukhsat ho jayenge , 

┱_ Be Pardgi aur iske lawazim sabke Sab Ahle Kufr ki dekha dekhi naamo nihaad Musalmano ke mahol mai Rivaaj pa Gaye hai'n aur ese hi log Musalman Aurto'n ko Parde se nikaal Kar be hayaai ke plateform per lane ki koshish mai lage hue hai'n , Jo Log Huzoor Aqdas Sallallahu Alaihivasallam ki itteba se zyada Yahoodo Nasaara ke Ahwaal Adaat ko apnaye hue hai'n , Ye log chahte hai'n k Khoob Azaad aur be hayaai ke Saath Musalmano ki Bahu Betiyo'n ko Bazaaro Parko mai behuda Libaas mai ghoomta dekhe , Saath hi Qur'an v Hadees ki talimaat ko Galat Kehne ki himmat bhi nahi , na Yu kehe banta hai k hum Islam ko Chhod chuke hai'n aur na Aurto'n ko Parde mai Dekhna gawara karte hai'n,

┱_ Jo Log Be Pardgi ko Rivaaj dene ki koshish mai hai'n aur Apni Bahu Betiyo'n ko Uropian American Aurto'n ki tarah be Haya aur be sharm bana chuke hai'n aur Unke behuda Libaas se Apne nafso ko taskeen dene Ka Raasta nikaal chuke hai'n Unme se Bahut se to ese hai'n Jo Mahaz naam ke Musalman hai'n aur Haya v Sharm ke Saath imaan ki Daulat bhi kho chuke hai'n , aur Bahut se log ese hai'n Jo Kisi darje mai Islam se chipke hue hai'n Magar unko Uropian American Tor Tareeqe mizaaj aur Behayai be sharmi ki Tabiyat ahista ahista unko Islam se door le ja rahi hai , Aap Sallallahu Alaihivasallam ne farmaya Haya aur Imaan dono Saathi hai'n, ek uthaya Jata hai to Doosra bhi utha liya jata Hai,  
            
▦══─────────────══▦

ReF✿┅╮   
         * Tohfa E Khawateen,*
                  ╨───────────────────── 
                    ✍
       
★ ╒═━┅━┅┅━┅┅━┅┅━┅━┅━┅━┅═╕
  
